ទារក​​កម្ពុជា​ទី​៦០០​ទទួល​បាន​ការ​​វះ​កាត់​ជំងឺ​បេះដូង​ចំហបាន​ជោគជ័យ​នៅ​ចំ​ថ្ងៃ​បុណ្យ​ណូអែល


Kathan Bopha Hospital
កុមារ​កម្ពុជា​​រង់ចាំ​ទទួល​សេវា​សុខាភិបាល​នៅ​ក្នុង​មន្ទីរ​មួយ​ក្នុង​ចំណោម​មន្ទីរ​ពេទ្យ​គន្ធបុប្ផា​ នៅ​រាជ​ធានី​ភ្នំពេញ នៅ​ថ្ងៃ​ទី​០២ ខែ​ធ្នូ ឆ្នាំ​២០២០។ (Dr. Beat Richner)

​កម្ពុជា | ជ័យ ច័ន្ទមុន្នី | 25 Dec 2020 | 0 Comments |

ទារក​​ម្នាក់​អាយុ​១​ឆ្នាំ បាន​ក្លាយ​ជា​កូន​កម្ពុជា​ទី​៦០០ ដែល​ត្រូវ​បាន​វះ​កាត់​ជំងឺ​បេះដូង​ចំហ​ដោយ​ជោគជ័យ​​ពី​សំណាក់​ក្រុម​គ្រូ​ពេទ្យ​នៅ​ឯ​មជ្ឈ​មណ្ឌល​បេះដូង​នៃ​មន្ទីរ​ពេទ្យ​គន្ធបុប្ផា​នៅ​រាជ​ធានី​ភ្នំពេញ គិត​ត្រឹម​ថ្ងៃនេះ។

ការ​វះ​កាត់​ដោយ​ជោគជ័យ​នូវ​ជំងឺ​បេះដូង​ចំហ​លើ​ទារក​ដ៏​ក្មេង​ខ្ចី​ម្នាក់​នេះ ត្រូវបាន​ប្រកាស​ឱ្យ​ដឹង​នៅ​ថ្ងៃ​នេះ​នៅ​លើ​ទំព័រ​ហ្វេសប៊ុក​វេជ្ជ​បណ្ឌិត Beat Richner ស្ថាបនិក​មន្ទីរ​ពេទ្យ​គន្ធបុប្ផា​ដែល​បាន​ទទួល​មរណភាព​កាល​ពី​ខែ​កញ្ញា​ឆ្នាំ​២០១៨​នោះ។

បើ​ខ្លឹមសារ​នោះ ទារក​តូច​ម្នាក់​នោះ មាន​ជំងឺ​បេះដូង​ចំហរ​ថត​លើ និង​ក្រោម​ចូល​គ្នា និង​មាន​សរសៃឈាម​សួត និង​សរសៃ​ឈាម​ក្រហម​បេះដូង​ត​ភ្ជាប់​គ្នា ប៉ុន្តែ ក្រុម​គ្រូ​ពេទ្យ​ឯកទេស​កម្ពុជា បាន​វះ​កាត់​កែ​តម្រូវ​ដោយ​ជោគជ័យ​នៅមជ្ឈ​មណ្ឌល​បេះដូង​ស្ថិត​ក្នុង​បរិវេណ​នៃ​មន្ទីរ​ពេទ្យ​គន្ធបុប្ផា​ទី​១​ថ្មី នៅ​រាជ​ធានី​ភ្នំពេញ។

លោក​វេជ្ជ​បណ្ឌិត គី សន្ទី ប្រធាន​មន្ទីរ​ពេទ្យ​គន្ធ​បុប្ផា​នៅ​រាជ​ធានី​ភ្នំពេញ ក្មេង​ប្រុស​តូច​នោះ គឺ​ជាកុមារ​កម្ពុជា​ទី​៦០០ ដែល​ត្រូវ​បាន​វះ​កាត់​ជំងឺ​បេះដូង​ចំហ​បាន​ជោគជ័យ​នៅ​មជ្ឈមណ្ឌល​បេះដូង​ក្នុង​មន្ទីរ​ពេទ្យ​គន្ធបុប្ផា។

វេជ្ជបណ្ឌិត​រូប​នេះ បាន​ឱ្យ​ដឹង​ផង​ដែរ​ថា កុមារ​កម្ពុជា​ដល់​ទៅ​ជាង ១,០០០​នាក់ ត្រូវ​បាន​វះ​កាត់​ជំងឺ​បេះដូង​ចំហ​ដោយ​ជោគជ័យ​ពី​សំណាក់​ក្រុម​គ្រូ​ពេទ្យ​ឯកទេស​កម្ពុជា​នៅ​ឯ​មជ្ឈ​មណ្ឌល​បេះដូង​ទាំង​២ នៃ​មន្ទីរ​ពេទ្យ​គន្ធបុប្ផា​ទាំង​នៅ​រាជ​ធានី​ភ្នំពេញ និង​ខេត្ត​សៀមរាប។

បើ​លោក​វេជ្ជ​បណ្ឌិត គី សន្ទី កុមារ​កម្ពុជា​ប្រហែល ១​ម៉ឺន​នាក់​ហើយ ត្រូវ​បាន​វះ​កាត់​ជំងឺ​បេះដូង​ចំហ​ដោយ​ជោគជ័យ​ចាប់​តាំង​ពី​ឆ្នាំ​២០១២ នៅ​ពេល​មន្ទីរ​ពេទ្យ​សប្បុរស​ធម៌​មួយ​នេះ បាន​បើក​មជ្ឈ​មណ្ឌល​វះកាត់​បេះដូង​​ទី​១​របស់​ខ្លួន​នៅ​ឯ​ខេត្ត​សៀមរាប។

ក្រៅ​ពី​វះ​កាត់​បេះដូង មន្ទីរ​ពេទ្យ​គន្ធបុប្ផា​ក៏​ផ្ដល់​ការ​វះ​កាត់​ជំងឺ​ដទៃ​ទៀត​​​សម្រាប់​​កុមារ​កម្ពុជា​ផង​ដែរ ខណៈ​មន្ទីរ​ពេទ្យ​​ផ្ដល់​ការ​ព្យាបាល​ជំងឺ​ និង​ការ​បង្កើត​កូន ដែល​រាល់​សេវា​សុខាភិបាល​ទាំង​អស់ ត្រូវ​បាន​ផ្ដល់​ជូន​​ដោយ​ឥត​ប្រាក់​កម្រៃ។

របាយការណ៍​​មន្ទីរ​ពេទ្យ​គន្ធបុប្ផា​ប្រចាំ​ឆ្នាំ​២០១៩​ បង្ហាញ​ថា កុមារ​កម្ពុជា ១,០០១​នាក់ ត្រូវ​បាន​វះ​កាត់​បេះដូង​ នៅ​ក្នុង​ចំណោម​កុមារ​សរុប ២៧,១៧៤​នាក់ ដែល​ទទួល​បាន​ការ​វះ​កាត់​នៅ​ក្នុង​មន្ទីរ​ពេទ្យ​គន្ធបុប្ផា។

របាយការណ៍​បង្ហាញ​ឱ្យ​ដឹង​ទៀត​ថា កុមារ​កម្ពុជាដល់​ទៅជិត ១៩​ម៉ឺន​នាក់ ដែល​ធ្លាក់​ខ្លួន​ឈឺ​ធ្ងន់​ធ្ងរ ត្រូវបាន​ដាក់​ឱ្យ​ព្យាបាល​នៅ​តាម​បណ្ដា​មន្ទីរ​ពេទ្យ​​គន្ធបុប្ផា​​ទាំង​នៅ​រាជ​ធានី​ភ្នំពេញ និង​ខេត្ត​សៀមរាប ក្នុង​នោះ​កុមារ​កម្ពុជា​ដល់​ទៅ​ ៣៥,០៥៧​នាក់ បាន​ធ្លាក់​ខ្លួន​ឈឺ​ដោយសារ​ជំងឺ​គ្រុន​ឈាម។

បើ​តា​របាយការណ៍​ដដែល កុមារ​កម្ពុជា​ដល់​ទៅ​ជាង ១​លាន ២​ម៉ឺន​នាក់​ទៀត ដែល​ធ្លាក់​ខ្លួន​ឈឺ បាន​ទទួល​ការ​ព្យាបាល​ពីមន្ទីរ​ពេទ្យ​ដោយ​មិន​តម្រូវ​ឱ្យ​សម្រាក​ព្យាបាល​នៅ​ក្នុង​មន្ទីរ​ពេទ្យ​នោះ​ឡើយ៕