អភិបាល​​ខេត្ត​ព្រៃវែង​ស្នើ​ក្រសួង​វប្បធម៌​​បញ្ឈប់​​ការ​ផ្សាយ​បទ​ចម្រៀង​ថ្មី​


តើ​ព្រៃវែង​អាក្រក់​ត្រង់ណា?
រូបភាព​ផ្ដិត​ចេញ​ពី​វីដេអូ​ឃ្លីប​ពិសេស​រយៈ​ពេល​ជិត​៣​នាទី ដែល​ត្រូវ​បាន​បង្ហោះ​ និង​​ចែក​ចាយ​បន្ត​បន្ទាប់នៅ​លើ​ទំព័រ​ហ្វេសប៊ុក​ចាប់​តាំង​ពី​ថ្ងៃ​ទី​៣ ខែ​កក្កដា ឆ្នាំ​២០២០។

ធុរកិច្ច | ជ័យ ច័ន្ទមុន្នី | 06 Jul 2020 | 0 Comments |

អភិបាល​ខេត្ត​ព្រៃវែង បាន​បញ្ចេញ​ប្រតិកម្ម​ទៅ​នឹង​បទ​ចម្រៀង​ថ្មី​មួយ​បទ ដោយ​ថា បទ​ចម្រៀង​ថ្មី​នេះ ប្រមាថ​ទៅ​លើ​ប្រជា​ពលរដ្ឋ​ខេត្ត​នេះ​ និង​ជំរុញ​ឲ្យ​មាន​ការ​រើស​អើង។

ក្នុង​លិខិត​ផ្ញើ​ទៅ​រដ្ឋ​មន្ត្រី​ក្រសួង​វប្បធម៌កាល​ពី​ថ្ងៃ​ទី​៣ ខែ​កក្កដា អភិបាល​ខេត្ត​ព្រៃវែង លោក ជា សុមេធី បាន​រៀប​រាប់​ថា បទ​ចម្រៀង​មាន​ចំណង​ជើង​ថា «អ្នក​ព្រៃវែង​អាក្រក់​ត្រង់ណា?» បាន​ប្រមាថ​យ៉ាង​«ធ្ងន់ធ្ងរ»​ទៅ​លើ​សេចក្ដី​ថ្លៃ​ថ្នូរ កិត្តិយស និង​សតិ​អារម្មណ៍​របស់​ប្រជា​ពលរដ្ឋ​ក្នុង​ខេត្ត​នេះ។

អភិបាល​ខេត្ត​រូប​នេះ ក៏​បាន​ចាត់​ទុក​បទ​ចម្រៀង​នេះ​ថា បង្ក​ឲ្យ​មាន​ការ​រើស​អើង​ និង​​ចោទ​ប្រកាន់​គ្មាន​មូលដ្ឋាន​ទៅ​លើ​ប្រជា​ពលរដ្ឋ​ខេត្ត​ព្រៃវែង​ផង​ដែរ។

លោក ជា សុមេធី បាន​ស្នើ​ទៅ​រដ្ឋ​មន្ត្រី​ក្រសួង​វប្បធម៌ អ្នកស្រី ភឿង សកុណា ចាត់​វិធានការ​តាម​ច្បាប់​ទៅ​លើ​ផលិត​កម្ម​ដែល​បាន​ផលិត​បទ​ចម្រៀង​នេះ និង​ទាមទារ​ឲ្យ​លុប​ចោល​បទ​ចម្រៀង​នេះ​ចេញ​ពី​បណ្ដាញ​ផ្សព្វផ្សាយ​សង្គម​ផង​ដែរ។

ឃ្លីប​វីដេអូ​ពិសេស​មួយ​មាន​រយៈ​ពេល​ជិត ៣​នាទី ត្រូវ​បាន​បង្ហោះ​នៅ​លើ​ទំព័រ​ហ្វេសប៊ុក Morodok Media កាល​ពី​ថ្ងៃ​ទី​៣ ខែ​កក្កដា។

វីដេអូ​នោះ បាន​បង្ហាញ​ពី​ការ​សម្ដែង​របស់​តួអង្គ​កម្លោះ​ម្នាក់ និង​ឪពុក​ម្ដាយ​របស់​ពួកគេ បាន​ចូល​ទៅ​ស្ដី​ដណ្ដឹង​នារី​ម្នាក់​ពី​ម្ដាយ​របស់​នាង ប៉ុន្តែ ​ត្រូវ​ម្ដាយ​របស់​នាង​បដិសេធ​ចំពោះ​សំណើ​ស្ដី​ដណ្ដឹង​នេះ បន្ទាប់​ពី​ដឹង​ថា យុវជន​រូប​នោះ និង​ក្រុម​គ្រួសារ​របស់​ពួកគេ ជា​ប្រជា​ពលរដ្ឋ​មក​ពី​ខេត្ត​ព្រៃវែង។

សំណេរ​លើ​ទំព័រ​ហ្វេសប៊ុក​ រៀប​រាប់​ថា បទ​ចម្រៀង​នេះ ត្រូវ​បាន​និពន្ធ​ទំនុក​ច្រៀង​ និង​ច្រៀង​ដោយ​តារា​ចម្រៀង លោក សយ រតនា ហើយ​ស្ថិត​ក្រោម​ការគ្រប់​គ្រង​ការ​ផលិត​ដោយ​លោក ឈួន សុខលីម៕