WB ​ផ្ដល់​ឥណទាន ៩៣​លាន​ដុល្លារ​ឲ្យ​កម្ពុជា​បន្ត​កែ​លម្អ​កម្មសិទ្ធី​ដីធ្លី


ផ្សារ​សហគមន៍​ជនជាតិ​ដើមភាគ​តិច
សកម្មភាព​លក់​ដូរ​នៅ​ក្នុង​ផ្សារ​សហគមន៍​ជន​ជាតិ​ដើម​ភាគ​តិច​ស្ថិត​ក្នុង​ក្រុងបានលុង ខេត្ត​រតនគិរី កាល​ពី​ខែ​កក្កដា ឆ្នាំ​២០១៨។ (មេគង្គ ដេលី)

សេដ្ឋកិច្ច | ជ័យ ច័ន្ទឧត្ដម | 27 Jun 2020 | 0 Comments |

ធនាគារ​ពិភព​លោក​​(World Bank)ប្រកាស​ពី​ការ​​អនុម័ត​យល់​ព្រម​លើ​ឥណទាន​ដល់​ទៅ ៩៣​លាន​ដុល្លារ​អាមេរិក​សម្រាប់​ប្រទេស​កម្ពុជា នៅ​ក្នុង​គម្រោង​បែង​ចែក​ដី​ធ្លី​សម្រាប់​​សង្គម​កិច្ច និង​ការ​អភិវឌ្ឍ​សេដ្ឋកិច្ច។ នេះ​បើ​តាម​សេចក្ដី​ប្រកាស​ព័ត៌មាន​មួយ​ចេញ​នៅ​ថ្ងៃ​ម្សិល​មិញ​នេះ។

ធនាគារ​ពិភព​លោក បាន​និយាយ​ក្នុង​សេចក្ដី​ប្រកាស​ព័ត៌មាន​បន្ត​ថា គម្រោង​បែង​ចែក​ដី​ធ្លី​សង្គម​កិច្ច និង​​ការ​​អភិវឌ្ឍ​សេដ្ឋកិច្ច​នេះ នឹង​ជួយ​ធ្វើ​ឲ្យ​មាន​ភាព​ប្រសើរ​ឡើង​នៅ​ក្នុង​ផ្នែក​​កម្មសិទ្ធិ​កាន់​កាប់​ដី​ធ្លី និង​ការ​ទទួល​បានហេដ្ឋា​រចនា​សម្ព័ន្ធ​ និង​​សេវាកម្ម​ផ្នែក​កសិកម្ម និង​សង្គម​សម្រាប់​ប្រចាជន​ក្រីក្រី​គ្មាន​ដី​ធ្លី និង​សហគមន៍​ជន​ជាតិ​ដើម​ភាគ​តិច​នៅ​កម្ពុជា។

ធនាគារ​ពិភព​លោក និយាយ​បន្ថែម​ថា ការ​ធានា​បាន​នូវ​សិទ្ធិ​កាន់​កាប់ និង​ប្រើ​ប្រាស់​ដី​ធ្លី និង​ធនធាន​ធម្មជាតិ​សម្រាប់​ប្រជា​ពលរដ្ឋ​តូចតាច និង​សហគមន៍​ជន​បទ គឺ​ជា​ផ្នែក​មួយ​នៃ​យុទ្ធសាស្ត្រ​​កាត់​បន្ថយ​ភាព​ក្រី​ក្រ​របស់​រដ្ឋាភិបាល​កម្ពុជា។

នាយក​គ្រប់​គ្រង​ធនាគារ​ពិភព​លោក​ប្រចាំ​កម្ពុជា អ្នក​ស្រី អ៊ីនហ្គូណា ដូប្រាចា និយាយ​ថា ការ​ទទួល​បាន​សិទ្ធិ​កាន់​កាប់​ដី​ធ្លី និង​ការ​បណ្ដុះ​បណ្ដាល​បច្ចេកទេស​កសិកម្ម មាន​សារៈ​សំខាន់​សម្រាប់​ប្រជាជន​ក្រីក្រ​ដែល​រស់​នៅ​តាម​តំបន់​ជនបទ។

«គម្រោង LASED ជំហាន៣ នេះ នឹងបន្ត​ជួយរដ្ឋាភិបាលក្នុងការផ្តល់ដីធ្លី និង​សិទ្ធិ​កាន់កាប់ដីធ្លីដល់គ្រួសារគ្មានដី​និង​គ្រួសារខ្វះដី និងធានាឱ្យមានសន្តិសុខផ្នែកសិទ្ធិកាន់កាប់ដីធ្លីសម្រាប់​សហគមន៍​ជនជាតិដើមភាគតិច នៅតាមតំបន់គោលដៅរបស់គម្រោងនេះ» អ្នកស្រី អ៊ីនហ្គូណា ដូប្រាចា និយាយ​នៅ​ក្នុង​សេចក្ដី​ប្រកាស​ព័ត៌មាន។

ធនាគារ​ពិភព​លោក អះ​អាង​ថា ខ្លួន​នឹង​ពង្រីក​ការ​អនុវត្ត​គម្រោង​មួយ​នេះ​សម្រាប​់ជំហាន​​៣ បន្ទាប់​ពី​គម្រោង​ជំហាន​១ និង២ ត្រូវ​បាន​អនុវត្ត​រួច​មក​ហើយ​នៅ​ក្នុង​កម្មវិធី​សម្បទាន​ដី​សង្គម​កិច្ច​របស់​ប្រទេស​កម្ពុជា។

ធនាគារ​នេះ និយាយ​ថា គម្រោង LASED ជំហាន៣​​នេះ នឹង​គ្រប​ដណ្ដប់​ទៅ​លើ​សហគមន៍​ចំនួន៧១​នៅ​តាម​បណ្ដា​ខេត្ត​នានា​របស់​កម្ពូជា ដោយ​គម្រោង​នេះ​នឹង​ជួយ​កសាង​ផ្លូវ​លំ​ជនបទ ប្រព័ន្ធ​ធារាសាស្ត្រ​ខ្នាត​តូច រចនា​សម្ព័ន្ធ​ទឹក​ស្អាត និង​អនាម័យ សាលា​រៀន មណ្ឌល​សុខភាព ជាដើម។

បើ​តាម​សេចក្ដី​ប្រកាស​ព័ត៌មាន នៅ​ក្នុង​ជំហាន១ និង​ជំហាន២​កន្លង​មក កម្ពុជា​បាន​បែង​ចែក​ដី​ធ្លី​ចំនួន ១៧,០០០​ហិកតា​រួច​ទៅ​ហើយ​សម្រាប់​ប្រជា​ពលរដ្ឋ​សាង​សង់​លំនៅឋាន និង​ការ​ដាំ​ដុះ​ដំណាំ​ផ្សេងៗ ដែល​មាន​ចំនួន​ជាង ៥,០០០​គ្រួសារ ក្នុង​នោះ​ពលរដ្ឋ​ជាង ៣,៣៦០​គ្រួសារ បាន​ទទួល​ប័ណ្ណ​កម្មសិទ្ធិ​ដី​ធ្លី​រួច​រាល់​ហើយ​គិត​ចាប់​តាំង​ពី​ឆ្នាំ​២០០៨​មក៕