កម្ពុជា​ប្រកាស​ពី​ការ​ទាញ​យក​​ដំណក់​ប្រេង​លើក​ដំបូង​របស់​ខ្លួន​​ថ្ងៃ​នេះ


oil extracting activities
រូបភាព​គ្មាន​កាល​បរិច្ឆេទ​បង្ហាញ​ពី​សកម្មភាព​ខួង​អណ្ដូង​ប្រេង​ក្នុង​ប្លុក A នៃ​ដែន​សមុទ្រ​កម្ពុជា ដែលត្រូវ​បាន​ផ្សព្វផ្សាយ​នៅ​លើ​ទំព័រហ្វេសប៊ុក​របស់​សម្ដេច​តេជោ ហ៊ុន សែន នៅ​ព្រឹក​ថ្ងៃ​ទី​២៩ ខែ​ធ្នូ ឆ្នាំ​២០២០។ (ទំព័រ​ហ្វេសប៊ុក​សម្ដេច​តេជោ ហ៊ុន សែន)

សេដ្ឋកិច្ច | ជ័យ ច័ន្ទខេមរា | 29 Dec 2020 | 0 Comments |

រាជ​រដ្ឋាភិបាល​កម្ពុជា​បាន​ប្រកាស​ពី​ដំណក់​ប្រេង​លើក​ដំបូង​ដែល​ត្រូវ​បាន​ទាញ​យក​ចេញ​ពី​ឈូង​សមុទ្រ​កម្ពុជា​នៅ​ថ្ងៃ​នេះ ដែល​ការ​ប្រកាស​នេះ​កើត​ឡើង​ចំ​ខួប ២២​ឆ្នាំ​នៃ​ការ​បញ្ចប់​សង្គ្រាម​ស៊ីវិល​រ៉ាំរ៉ៃ​ទាំង​ស្រុង​នៅ​កម្ពុជា។

ដំណក់​ប្រេង​ដំបូង​របស់​កម្ពុជា​នេះ ត្រូវបាន​សម្ដេច​តេជោ ហ៊ុន សែន នាយក​រដ្ឋ​មន្ត្រី​កម្ពុជា​ ប្រកាស​ឱ្យ​ដឹង​ជា​សាធារណៈ​នៅ​ព្រឹក​ថ្ងៃ​អង្គារ​នេះ​ក្នុង​សន្និសីទ​ផ្សាយ​បន្ត​ផ្ទាល់​ពី​គេហដ្ឋាន​របស់​លោក​នៅ​ឯ​ទីក្រុង​តាខ្មៅ។

ប្រមុខ​រដ្ឋាភិបាល​រូប​នេះ បាន​ប្រកាស​ថា ដំណក់​ប្រេង​លើក​ដំបូង​របស់​កម្ពុជា​នេះ ត្រូវ​បាន​ទាញ​យក​ចេញ​ពី​ប្លុក A ស្ថិត​នៅ​ក្នុង​ដែន​សមុទ្រ​កម្ពុជា ដោយ​មិន​ស្ថិត​នៅ​ក្នុង​តំបន់​ត្រួត​ស៊ីគ្នា​ជាមួយ​ប្រទេស​ថៃ​នោះ​ឡើយ។

ការ​ប្រកាស​នេះ​បាន​កើត​ឡើង​យឺត​ជាង ៦​ខែ​​ពី​អ្វី​ដែល​សម្ដេច​តេជោ ហ៊ុន សែន បានការ​ប្រកាស​កាល​ពី​ខែ​វិច្ឆិកា​ឆ្នាំ​មុន​ថា ​ការ​ទាញ​យក​បាន​ដំណក់​ប្រេង​ដំបូង​ចេញ​ពី​ប្លុក​ A របស់​កម្ពុជា​នេះ នឹង​កើត​ឡើង​នៅ​ពាក់​កណ្ដាល​ឆ្នាំ​២០២០​នេះ។

ការ​ប្រកាស​ពី​ការ​ទាញ​យក​តំណក់​ប្រេង​លើក​ដំបូង​របស់​កម្ពុជា​នេះ បាន​កើត​ឡើង​ជាង ៨​ឆ្នាំ​ក្រោយ​ពី​កម្ពុជា​បាន​ខក​ខាន​មិន​អាច​សម្រេច​បាន​ការ​ទាញ​យក​តំណក់​ប្រេង​លើក​ដំបូង​របស់​ខ្លួន ដែល​ត្រូវ​បាន​គ្រោង​ទាញ​យក​នៅ​ថ្ងៃ​ទី​១២ ខែ​ធ្នូ ឆ្នាំ​២០១២

សម្ដេច​តេជោ ហ៊ុន សែន បាន​រៀបរាប់​លើ​ទំព័រ​ហ្វេសប៊ុក​របស់​លោក​នៅ​ព្រឹក​ថ្ងៃ​នេះ​ថា កិច្ច​ព្រម​ព្រៀង​ប្រេង​កាត​ដំបូង​ ត្រូវ​បាន​ធ្វើ​ឡើង​នៅ​ឆ្នាំ​២០០២ រវាង​រាជ​រដ្ឋាភិបាល​កម្ពុជា និង​សម្ព័ន្ធ​ក្រុមហ៊ុន​ Chevron របស់​អាមេរិក ក្រុមហ៊ុន LG Caltex Oil Corporation របស់​កូរ៉េ​ខាង​ត្បូង ក្រុមហ៊ុន Moeco Cambodia Co., Ltd របស់​ជប៉ុន និង​ក្រុមហ៊ុន KrisEnergy របស់​សិង្ហបុរី។

បើ​តាម​សម្តេច​តេជោ ហ៊ុន សែន ក្រុមហ៊ុន​ប្រេង​អាមេរិក Chevron បាន​ប្រកាស​ពី​ការ​រក​ឃើញ​ប្រេង​នៅ​ឆ្នាំ​២០១០ ហើយ​បាន​កសាង​គម្រោង​ផែនការ​អភិវឌ្ឍន៍ និង​អាជីវកម្ម​ពី​រាជ​រដ្ឋាភិបាល ប៉ុន្តែ គម្រោង​នេះ​បាន​បរាជ័យ​ទៅ​វិញ បន្ទាប់​ពី​មិន​ឈាន​ដល់​កិច្ច​ព្រម​ព្រៀង​ជាមួយ​រាជ​រដ្ឋាភិបាល​កម្ពុជា ហើយ​ក្រុមហ៊ុន​ទាំង​នេះ បាន​សម្រេច​ដក​ខ្លួន​ជា​បន្ត​បន្ទាប់​ពី​គម្រោង​អាជីវកម្ម​អណ្ដូង​ប្រេង​មួយ​នេះ។

បើ​តាម​សេចក្ដី​រាយការណ៍​របស់​សារព័ត៌មាន​ភ្នំពេញ ប៉ុស្តិ៍ អណ្ដូង​ប្រេង​ប្លុក A របស់​កម្ពុជា ត្រូវ​បាន​វិនិយោគ​ទាំង​ស្រុង​ដោយ​ក្រុមហ៊ុន Apsara ដែល​ជា​ក្រុមហ៊ុន​ចំណុះ​ឱ្យ​ក្រុមហ៊ុន KrisEnergy Co., Ltd របស់​ប្រទេស​សិង្ហបុរី។ ក្រុមហ៊ុន​មួយ​នេះ រំពឹង​ថា​នឹង​ទាញ​យក​ប្រេង​បាន​ដល់​ទៅ ៧,៥០០​បារ៉ែល​ក្នុង​មួយ​ថ្ងៃ។

តំបន់​ប្រេង​ប្លុក​ A របស់​កម្ពុជា មាន​ទំហំ​ដល់​ទៅ ៣,០៨៣​គីឡូម៉ែត្រ​ការ៉េ ស្ថិត​ក្នុង​ដែន​សមុទ្រ​កម្ពុជា​នៃ​ឈូង​សមុទ្រ​ថៃ និង​មាន​ចម្ងាយ ១៦៣​គីឡូម៉ែត្រ​ពី​ឆ្នេរ​សមុទ្រ​ខេត្ត​ព្រះសីហនុ៕