សម្ដេច​តេជោ​ ហ៊ុន សែន ប្រកាស​ថា​ លោក​ និង​ភរិយា​​មិន​ឆ្លង​​ឆ្លង​វីរុស


សម្ដេច​តេជោ ហ៊ុន សែន
សម្ដេច​តេជោ ហ៊ុន សែន នាយក​រដ្ឋ​មន្ត្រី​កម្ពុជា ប្រកាស​លើ​ទំព័រ​ហ្វេសប៊ុក​របស់​លោក​នៅ​ថ្ងៃ​នេះ​ថា លោក និង​ភរិយា ព្រម​ទាំង​អ្នក​នៅ​ជុំ​វិញ​ខ្លួន​លោក មិន​មាន​ឆ្លង​វីរុស​កូរ៉ូណា​នោះ​ឡើយ។ (SPM)

​កម្ពុជា | ជ័យ ច័ន្ទខេមរា | 18 Nov 2020 | 0 Comments |

សម្ដេច​តេជោ​ ហ៊ុន សែន នាយករដ្ឋ​មន្ត្រី​កម្ពុជា បាន​ប្រកាស​ថា លោក និង​ភរិយា​លោក ព្រម​ទាំង​មនុស្ស​ផ្សេង​ទៀត​ដែល​នៅ​ជុំ​វិញ​ខ្លួន​លោក មិន​បាន​ឆ្លង​វីរុស​កូរ៉ូណា​នោះ​ឡើយ ក្រោយ​ការ​ធ្វើ​តេស្ត​លើក​ទី​៤​រួច​មក​នោះ។

សម្ដេច​តេជោ ហ៊ុន សែន បាន​រក្សា​ខ្លួន​លោក​នៅ​ដាច់​ដោយ​ឡែក​អស់​រយៈ​ពេល ១៤​ថ្ងៃ​រួច​មក​ហើយ​ចាប់​តាំង​ពី​ថ្ងៃ​ទី​៤ ខែ​វិច្ឆិកា បន្ទាប់​ពី​កម្ពុជា​បាន​ដំណឹង​ថា រដ្ឋ​មន្ត្រី​ការបរទេស​ហុងគ្រី លោក ភីធ័រ ស៊ីចាតូ ដែល​បាន​ធ្វើ​ដំណើរ​ទស្សនកិច្ច​នៅ​កម្ពុជា​នៅ​ថ្ងៃ​ទី​៣ ខែ​វិច្ឆិកា​នោះ ត្រូវ​បាន​ធ្វើ​តេស្ត និង​រក​ឃើញ​ឆ្លង​វីរុស​កូរ៉ូណា នៅ​ពេល​ធ្វើ​ដំណើរ​ទៅ​ដល់​ប្រទេស​ថៃ​នៅ​ក្នុង​ថ្ងៃ​ដដែល​នោះ។

ប្រមុខ​រដ្ឋាភិបាល​កម្ពុជា​រូប​នេះ បាន​ធ្វើ​ចត្តាឡីស័ក​ខ្លួន​ឯង និង​បាន​ធ្វើ​តេស្ត​សុខភាព​ចំនួន ៣​លើក​រួច​មក​ហើយ ហើយ​ក៏​ត្រូវ​ធ្វើ​តេស្ត​លើក​ទី​៤​នៅ​ថ្ងៃ​នេះ​ផង​ដែរ។

ទំព័រ​ហ្វេសប៊ុក​របស់​សម្ដេច​តេជោ ហ៊ុន សែន បាន​រៀបរាប់​ថា​៖ «លទ្ធផល​នៃ​ការ​ធ្វើ​តេស្ត​លើក​ទី​៤ ដែល​ជា​លើក​ចុង​ក្រោយ គឺ​ល្អ​ណាស់​សម្រាប់​ខ្ញុំ និង​ភរិយា ព្រម​ទាំង​អ្នក​នៅ​ជាមួយ​ដែល​បាន​បង្ហាញ​ច្បាស់​ថា អវិជ្ជមាន​ខូវីដ​-១៩ ពោល​គឺ​ពុំ​មាន​ឆ្លង​ជំងឺ​ដ៏​កាច​សាហាវ​នេះ​ទេ»

មេដឹកនាំ​កម្ពុជា​រូប​នេះ បាន​រៀបរាប់​បន្ត​ថា លោក​នឹង​ចាប់​ផ្ដើម​ចេញ​ទៅ​ធ្វើការ ឬ​ក៏​ហាត់​ប្រាណ​នៅ​ខាង​ក្រៅ​ឡើង​វិញ​ដូច​មុន​ថ្ងៃ​ទី​៤ ខែ​វិច្ឆិកា ប៉ុន្តែ លោក​បញ្ជាក់​ថា លោក​នៅ​មិន​ទាន់​ជួប​កូនៗ និង​ចៅៗ​របស់​លោក​នៅ​ឡើយ​ទេ ដោយ​ត្រូវ​រក្សា​ខ្លួន​នៅ​ដាច់​ដោយ​ឡែក​មួយ​រយៈ​ទៀត។

សម្ដេច​តេជោ ហ៊ុន សែន រៀបរាប់​លើ​ទំព័រ​ហ្វេសប៊ុក​បន្ត​ថា​៖ «តែ​ខ្ញុំ​នៅ​តែ​មិន​ទាន់​ឱ្យ​កូន និង​ចៅ​របស់​ខ្ញុំ​មក​ផ្ទះ​របស់​ខ្ញុំ​មួយ​រយៈ​ទៀត ដើម្បី​ធានា​ឱ្យ​ប្រាកដ​ថា ខ្ញុំ​គ្មាន​មេរោគ​ចម្លង​ទៅ​កូន និង​ចៅ​របស់​ខ្ញុំ​នោះ​ឡើយ»

ទន្ទឹម​គ្នា​នេះ ប្រមុខ​រដ្ឋាភិបាល​កម្ពុជា​រូប​នេះ​ បញ្ជាក់​ថា ព្រឹត្តិការណ៍​ថ្ងៃ​ទី​៣ វិច្ឆិកា នឹង​ត្រូ​បិទ​បញ្ចប់​ បន្ទាប់​ពី​ថ្ងៃ​ទី​២៥ ខែ​វិច្ឆិកា​ខាង​មុខ​នេះ ក្រោយ​ពី​លទ្ធផល​តេស្ត​លើ​មនុស្ស​ទាំងអស់​ដែល​ពាក់​ព័ន្ធ​នឹង​ព្រឹត្តិការណ៍​នេះ នឹង​ត្រូវ​ប្រកាស​ឱ្យ​ដឹង​៕