ដំណើរការ​​សាង​សង់​ព្រលាន​យន្ត​ហោះ​ថ្មី​សម្រេច​បាន​ខ្ទង់​​​៣០​%ហើយ


អាកាសយានដ្ឋាន
សម្ភារៈ​សំណង់​ផ្សេង ត្រូវ​បាន​ប្រមូល​ផ្ដុំ​ដាក់​នៅ​លើ​ទីតាំង​នៃ​គម្រោង​សាង​សង់​អាកាស​យានដ្ឋាន​អន្តរជាតិ​ភ្នំពេញ ស្ថិត​នៅ​ឃុំ​ស្លែង ស្រុក​កណ្ដាលស្ទឹង ខេត្ត​កណ្ដាល ចម្ងាយ​ប្រហែល ២០​គីឡូម៉ែត្រ​ពី​រាជ​ធានី​ភ្នំពេញ ថ្ងៃ​ទី​២២ ខែ​មិថុនា ឆ្នាំ​២០២០។ (ក្រសួង​រៀបចំដែនដី នគរូបនីយកម្ម និង​សំណង់)

អចលនទ្រព្យ | ជ័យ ច័ន្ទមុន្នី | 23 Jun 2020 | 0 Comments |

រដ្ឋាភិបាល​អះ​អាង​ថា ដំណើរការ​សាង​សង់​អាកាស​យានដ្ឋាន​អន្តរជាតិ​ភ្នំពេញ​ថ្មី សម្រេច​បាន​ប្រហែល ៣០​ភាគរយ ហើយ​រំពឹង​ថា គម្រោង​សាង​សង់​អាកាស​ដ្ឋាន​ថ្មី​នេះ នឹង​បញ្ចប់​ទៅ​តាម​ការ​គ្រោង​ទុក​នៅ​ក្នុង​រយៈ​ពេល ៣​ឆ្នាំ​ក្រោយ។

សម្ដេច​តេជោ ហ៊ុន សែន នាយករដ្ឋ​មន្ត្រី​កម្ពុជា បាន​ធ្វើ​ដំណើរ​ទៅ​ត្រួត​ពិនិត្យ​ដំណើរការ​សាង​សង់​អាកាស​យានដ្ឋាន​អន្តរជាតិ​ភ្នំពេញ​ថ្មី ដែល​មាន​ទីតាំង​ស្ថិត​នៅ​ក្នុង​ឃុំ​ស្លែង ស្ថិត​ក្នុង​ស្រុក​កណ្ដាល​ស្ទឹង ខេត្ត​កណ្ដាល​ ឬ​មាន​ចម្ងាយ​ប្រហែល ២០​គីឡូម៉ែត្រ​ពី​រាជ​ធានី​ភ្នំពេញ កាល​ពី​ថ្ងៃ​ម្សិល​មិញ​នេះ។

នៅ​លើ​ទំព័រ​ហ្វេសប៊ុក​ផ្លូវការ​របស់​លោក នាយក​រដ្ឋ​មន្ត្រី​កម្ពុជា​រូប​នេះ បាន​បង្ហាញ​ថា ដំណើរការ​សាង​សង់​អាកាស​យានដ្ឋាន​ថ្មី​នេះ ដែល​មួយ​ផ្នែក​ស្ថិត​ក្នុង​ភូមិសាស្ត្រ​នៃ​ស្រុក​បាទី ខេត្ត​តាកែវ ហើយ​មួយ​ផ្នែក​ធំ​ទៀត​ស្ថិត​នៅ​ក្នុង​ភូមិសាស្ត្រ​ស្រុក​កណ្ដាលស្ទឹង និង​ក្រុង​តាខ្មៅ ខេត្ត​កណ្ដាល​នោះ សម្រេច​បាន​​ប្រមាណ ៣០​ភាគរយ​ហើយ។

បើ​តាម​គម្រោង អាកាស​យានដ្ឋាន​អន្តរជាតិ​ភ្នំពេញ​ថ្មី​នេះ គ្រោង​សាង​សង់​លើ​ផ្ទៃ​ដី​ទំហំ​ដល់​ទៅ ២,៦០០​ហិកតា ហើយ​គ្រោង​ចំណាយ​ទឹក​ប្រាក់​ដល់​ទៅ ១,៥០០​លាន​ដុល្លារ​ឯនោះ។

មេដឹកនាំ​កម្ពុជា​រូប​នេះ បាន​រៀប​រាប់​ថា ​ទឹក​ប្រាក់​វិនិយោគ​ដល់​ទៅ ១,១០០​លាន​ដុល្លារ​នៅ​ក្នុង​ចំណោម​ទឹក​ប្រាក់​វិនិយោគ​សរុប​នេះ បាន​មក​ពី​កម្ចី​ធនាគារ​បរទេស ហើយ​ទឹក​ប្រាក់​ដល់​ទៅ ២៨០​លាន​ដុល្លារ​ទៀត ត្រូវ​បាន​វិនិយោគ​ដោយ​ក្រុម​ហ៊ុន​​វិនិយោគ​អាកាស​យានដ្ឋាន​កម្ពុជា(CAIC) ដែល​ជា​បុត្រ​សម្ព័ន្ធ​នៃ​សម្ព័ន្ធ​ក្រុមហ៊ុន​របស់​លោក​ឧកញ៉ា ពុង ឃាវសែ ខណៈ​ដើម​ទុន​ចុះ​បញ្ជី​មាន​ទំហំ ១២០​លាន​ដុល្លារ។

គម្រោង​សាង​សង់​ព្រលាន​យន្តហោះ​តម្លៃ​រាប់​ពាន់​លាន​ដុល្លារ​នេះ ត្រូវ​បាន​រំពឹង​ថា នឹង​បញ្ចប់​នូវ​ដំណាក់​កាល​ទី​១​នៅ​ឆ្នាំ​២០២៣ ដំណាក់​កាល​ទី​២​នៅ​ឆ្នាំ​២០៣០ ដែល​អនុញ្ញាត​ឲ្យ​ព្រលាន​យន្ត​ហោះ​ទទួល​អ្នក​ដំណើរ​ចំនួន ១៣​លាន​នាក់ ហើយ​ដំណាក់​កាល​ចុង​ក្រោយ​នៅ​ឆ្នាំ​២០៥០ ដែល​ត្រូវ​បាន​រំពឹង​ថា នឹង​ទទួល​បាន​អ្នក​ដំណើរ​ដល់​ទៅ ៣០​លាន​នាក់​ក្នុង​មួយ​ឆ្នាំ​នា​ពេល​នោះ៕