តើ​មនុស្ស​ប៉ុន្មាន​លាន​នាក់​​នៅ​លើ​ពិភព​លោក​ពុំ​ទាន់​មាន​​បង្គន់​ប្រើ​ប្រាស់?


កុមារីកម្ពុជា
កុមារ​កម្ពុជា​នៅ​ក្នុង​សាលារៀន​មួយ លាង​សម្អាត​ដៃ​របស់​ពួកគេ​ជាមួយ​ឧបករណ៍​ទឹក​ស្អាត​ផ្ដល់​ដោយ​អង្គការ UNICEF។ (UN)

​អន្តរ​​ជាតិ | ជ័យ ច័ន្ទមុន្នី | 20 Nov 2020 | 0 Comments |

ខណៈ​ទិវា​​បង្គន់​អនាម័យ​ពិភព​លោក​នោះ​ត្រូវ​បាន​ប្រារព្ធ​ជា​សកល​នោះ មនុស្ស​ជាតិ​នៅ​ជុំ​វិញ​ពិភព​លោក​មិន​តិច​រយ​លាន​នាក់​នោះ​ទេ កំពុង​រស់នៅ​ដោយ​ពុំ​មាន​បង្គន់​អនាម័យ​ប្រើ​ប្រាស់​នោះ​ឡើយ។

​របាយការណ៍​អង្គការ​សុខភាព​ពិភព​លោក​ចេញ​កាល​នៅ​ពាក់​កណ្ដាល​ឆ្នាំ​នេះ បាន​ឱ្យ​ដឹង​ថា មនុស្ស​ដល់​ទៅ ៦៧៣​លាន​នាក់​នៅ​ទូទាំង​ពិភព​លោក នៅ​មិន​ទាន់​មាន​បង្គន់​សម្រាប់​ប្រើ​ប្រាស់​នៅ​ឡើយ​ទេ។

អង្គការ​សុខភាព​ពិភព​លោក ចាត់​ទុក​កង្វះ​ខាត​បង្គន់​ប្រើ​ប្រាស់​នេះ គឺ​ជា​ប្រភព​ចម្បង​មួយ​នៃ​បញ្ហា​សុខភាព​ប្រជាជន​នៅ​លើ​ពិភព​លោក ហើយ​បញ្ហានេះ​នាំ​ឱ្យ​មាន​ការ​ចោទ​សួរ​ថា តើ​គោលដៅ​អភិវឌ្ឍន៍​ចីរភាព​របស់​អង្គការ​សហ​ប្រជាជាតិ​នៅ​ឆ្នាំ​២០៣០​នោះ អាច​សម្រេច​បាន​ឬ​យ៉ាងណា។

កាល​ពី​ឆ្នាំ​២០១០ មហា​សន្និបាត​អង្គការ​សហ​ប្រជាជាតិ បាន​សម្រេច​ទទួល​ស្គាល់​ថា ការ​ទទួល​បាន​ទឹក​ស្អាត និង​សុវត្ថិភាព​សម្រាប់​ការ​ទទួល​ទាន និង​អនាម័យ គឺ​ជា​ផ្នែក​មួយ​នៃ​សិទ្ធិ​មនុស្ស ហើយ​មហាសន្និបាត បាន​អំពាវ​នាវ​ទៅ​អន្តរជាតិ​ឱ្យ​ខិត​ខំ​ជួយ​ដល់​ប្រទេស​នានា ដើម្បី​ផ្ដល់​ទឹក​ផឹក​ស្អាត និង​មាន​តម្លៃ​សមរម្យ និង​អនាម័យ​ទៅ​ដល់​មនុស្ស​ជាតិ។

គិត​ត្រឹម​ឆ្នាំ​២០១៧​កន្លង​មក ប្រជាជន​ត្រឹម​តែ ៣.៤​ពាន់​លាន​នាក់​ប៉ុណ្ណោះ ទទួល​បាន​សេវា​អនាម័យ​ដែល​ត្រូវ​បាន​គ្រប់​គ្រង​ដោយ​សុវត្ថិភាព ដែល​ចំនួន​នេះ​ទើប​តែ​ស្មើ​នឹង​ប្រហែល ៤៥​ភាគរយ​នៃ​ចំនួន​ប្រជាជន​សរុប​នៅ​លើ​ពិភព​លោក៕