គ្រូ​ពេទ្យ គ្រូ​បង្រៀន ​កម្លាំង​ប្រដាប់​អាវុធ មន្ត្រី​ពន្ធនាគារ​​ នឹង​​ទទួល​បាន​​វ៉ាក់ស៊ាំង​មុន​គេ


វ៉ាក់ស៊ាំង
រដ្ឋាភិបាល​ចក្រភព​អង់គ្លេស​​បាន​ក្លាយ​ជា​ប្រទេស​ដំបូង​គេ​នៅ​លើ​ពិភព​លោក ដែល​បាន​សម្រេច​បញ្ជា​ទិញ​វ៉ាក់ស៊ាំង​​សម្រាប់​ចាក់​ឱ្យ​ពលរដ្ឋ​របស់​គេ​។

​កម្ពុជា | ជ័យ ច័ន្ទមុន្នី | 07 Dec 2020 | 0 Comments |

ប្រមុខ​រដ្ឋាភិបាល​បាន​បញ្ជាក់​ថា ក្រុម​គ្រូ​ពេទ្យ ​គ្រូ​បង្រៀន ​កង​កម្លាំង​ប្រដាប់​អាវុធ និង​មន្ត្រី​ពន្ធនាគារ នឹង​ទទួល​បាន​ការ​ចាក់​វ៉ាក់ស៊ាំង​ការពារ ក្រោយ​ពេល​កម្ពុជា​សម្រេច​បញ្ជា​ទិញ​​វ៉ាក់ស៊ាំង​ការពារ​វីរុស​កូរ៉ូណា។

នៅ​ល្ងាច​ថ្ងៃ​ចន្ទ​ម្សិល​មិញ​នេះ សម្ដេច​តេជោ ហ៊ុន សែន នាយករដ្ឋ​មន្ត្រី​កម្ពុជា បានរៀបរាប់​លើ​ទំព័រ​ហ្វេសប៊ុក​លោក​ថា លោក​បាន​ណែនាំ​ទៅ​រដ្ឋ​មន្ត្រី​សុខាភិបាល និង​រដ្ឋ​មន្ត្រី​សេដ្ឋកិច្ច និង​ហិរញ្ញវត្ថុ ឱ្យ​ត្រៀម​ថវិកា​ស្រាប់​ទិញ​វ៉ាក់ស៊ាំង ១​លាន​ដូសនៅ​ដំណាក់​កាល​ដំបូង។ប្រមុខ​រាជ​រដ្ឋាភិបាល​កម្ពុជា​រូប​នេះ បាន​រៀបរាប់​បន្ត​ថា លោក​បាន​ណែនាំ​ទៅ​រដ្ឋ​មន្ត្រី​ទាំង ២​រូប ឱ្យ​ស្វែង​រក​ការ​ជួយ​គាំ​ទ្រ​ពី​ដៃ​គូ​អភិវឌ្ឍន៍ ដើម្បី​ស្វែង​រក​ជំនួយ​បន្ថែម​ជួយ​មក​ដល់​ប្រជាជន​កម្ពុជា ខណៈ​កម្ពុជា​ខ្វះ​ខាត​ថវិកា​សម្រាប់​បញ្ជា​ទិញ​វ៉ាក់ស៊ាំង​នេះ។

សម្ដេច​តេជោ​បញ្ជាក់​ថា វ៉ាក់ស៊ាំង​ប្រឆាំង​វីរុស​កូរ៉ូណា​នេះ​ដែល​កម្ពុជា​ត្រៀម​បញ្ជា​ទិញ ១​លាន​ដូស​នេះ អាច​ចាក់​បាន​មនុស្ស​តែ ៥០​ម៉ឺន​នាក់​ប៉ុណ្ណោះ ដោយ​មនុស្ស​ម្នាក់​ត្រូវ​ចាក់​ ២​ដង ខណៈ​លោក​ថា កម្ពុជា​មាន​មនុស្ស​ខ្ទង់ ១០​លាន​នាក់​ក្នុង​ចំណោម​ប្រជាជនសរុប ១៦​លាន​នាក់ ត្រូវ​ការ​ចាក់​វ៉ាក់ស៊ាំង​ប្រឆាំង​វីរុស​នេះ។

សម្ដេច​តេជោ ហ៊ុន សែន ក៏​បាន​បញ្ជាក់​ផង​ដែរ​ថា វ៉ាក់ស៊ាំង​ ១​លាន​ដូស​ដែល​កម្ពុជា​ត្រៀម​បញ្ជា​ទិញ​នោះ នឹង​ត្រូវ​ចាក់​ទៅ​លើ​មនុស្ស​ទាំង​ឡាយ​ណា​ដែល​ធ្វើការ​នៅ​កន្លែង​មាន​ហានិភ័យ​ខ្ពស់ និង​មនុស្ស​ដែល​មាន​ហានិភ័យ​។

ក្នុង​សារ​ជា​សំឡេង​នៅ​ល្ងាច​ម្សិល​មិញ​នេះ សម្ដេចតេជោ ហ៊ុន សែន បញ្ជាក់​ថា ​គ្រូ​ពេទ្យ គឺ​ជា​ក្រុម​អាទិភាព​ដំបូង​គេ​ដែល​នឹង​ទទួល​បាន​ការ​ចាក់​វ៉ាក់ស៊ាំង​នេះ ដែល​លោក​ចាត់​ទុក​ជា​កម្លាំង​ជួរ​មុខ​គេ​ប្រឈម​មុខ​នឹង​គ្រោះ​ថ្នាក់​នៃ​ការ​ឆ្លង​វីរុស​កូរ៉ូណា។

សម្ដេច​តេជោ ហ៊ុន សែន ថ្លែង​ថា​៖ «ខ្ញុំ​គ្រាន់​តែ​លើក​ជា​យោបល់ ក្នុង​ ១​លាន​ដូស​នេះ អ្នក​ដែល​ត្រូវ​បាន​​គឺ​ថា សំដៅ​ទៅ​លើ​គ្រូ​ពេទ្យ ដែល​ត្រូវ​បាន​មុន​គេ ព្រោះ​អ្នក​ទាំង​ហ្នឹង​គឺ​ជា​អ្នក​ដែល​ប្រឈម​នឹង​គ្រោះ​ថ្នាក់​ជួរ​មុខ​តែ​ម្ដង»

ប្រមុខ​រាជ​រដ្ឋាភិបាល​បន្ថែម​ថា ​ក្រុម​គ្រូ​បង្រៀន កង​កម្លាំង​ប្រដាប់​អាវុធ​ទាំង ៣​ប្រភេទ មន្ត្រី​ពន្ធនាគារ គឺ​ជា​ក្រុម​បន្ទាប់​ដែល​នឹង​ទទួល​បាន​វ៉ាក់ស៊ាំង​ ដោយ​លោក​ចាត់​ទុក​ក្រុម​ទាំង​នេះ ប្រឈម​នឹង​ហានិភ័យ​ខ្ពស់​ផង​ដែរ។

ទោះជាយ៉ាងណា ប្រមុខ​រាជ​រដ្ឋាភិបាល​កម្ពុជា​នៅ​មិន​ទាន់​សម្រេច​នៅ​ឡើយ​ទេ​ថា នឹង​ត្រូវ​បញ្ជា​ទិញ​វ៉ាក់ស៊ាំង​ផលិត​ឡើង​ដោយ​ប្រទេស​ណា​មួយ​នោះ។

គិត​មក​ដល់​ពេល​នេះ សហរដ្ឋ​អាមេរិក រុស្ស៊ី អង់គ្លេស និង​អាល្លឺម៉ង់ បាន​ប្រកាស​ឱ្យ​ដឹង​ពី​ការ​រក​ឃើញ​វ៉ាក់ស៊ាំង​ប្រឆាំង​នឹង​វីរុស​កូរ៉ូណា ដោយ​ប្រសិទ្ធភាព​នៃ​វ៉ាក់ស៊ាំង​របស់​ប្រទេស​ទាំង​នេះ មាន​កម្រិត​ខុសៗ​គ្នា។

វ៉ាក់ស៊ាំង Oxford Uni-AstraZeneca របស់​អង់គ្លេស មាន​ប្រសិទ្ធភាព​ចន្លោះ​ពី ៦០ ទៅ ៩០​ភាគរយ ខណៈ​វ៉ាក់ស៊ី Moderna របស់​អាមេរិក ត្រូវ​បាន​ប្រកាស​ថា មាន​ប្រសិទ្ធភាព​ដល់​ទៅ ៩៥​ភាគរយ​ឯណោះ។ ចំណែក​វ៉ាក់ស៊ាំង Sputnik V របស់​រុស្ស៊ី​វិញ ត្រូវ​បាន​គេ​អះ​អាង​ថា មាន​ប្រសិទ្ធភាព​ ៩២​ភាគរយ ហើយ​វ៉ាក់ស៊ាំង Pfizer-BioNTech របស់​អាមេរិក-អាមេរិក ត្រូវបាន​បញ្ជាក់​ថា មាន​ប្រសិទ្ធភាព ៩៥​ភាគរយ។