ភ្ញៀវ​ទេសចរ​ចិន​បន្ត​​នាំ​​មុខ​​លើ​តារាង​​ភ្ញៀវ​បរទេស​ចូល​មក​​​កម្ពុជា


ទេសចរណ៍
ភ្ញៀវ​​បរទេស​ម្នាក់ ​​ងូត​ទឹក​ជាមួយ​ដំរី​ញី​ឈ្មោះ​«ក្រពុំ»​នៅ​ទឹក​ធ្លាក់​លែង​ត្រុក ​នៅ​​ភូមិ​ពូតាំង ​ខេត្ត​មណ្ឌលគិរី នៅ​ខែ​តុលា​​ឆ្នាំ​២០១៩។ រូបថត៖ គឹម ពេជ្រ​កញ្ញា

​កម្ពុជា | ជ័យ ច័ន្ទឧត្ដម | 21 Oct 2019 | 0 Comments |

តួលេខពីរដ្ឋាភិបាលបង្ហាញថា ភ្ញៀវទេសចរចិន នៅតែបន្តឈរនៅលំដាប់ថ្នាក់កំពូលនៅក្នុងចំណោមភ្ញៀវទេសចរបរទេសទាំងអស់ ដែល​បាន​ចូល​មក​ប្រទេស​កម្ពុជា​​នៅក្នុងរយៈពេល ៨ខែក្នុងឆ្នាំនេះ។

ស្ថិតិរបស់ក្រសួងទេសចរណ៍ បានឱ្យដឹងថា កម្ពុជាទទួលបានភ្ញៀវទេសចរបរទេសសរុបជាង ៤.៣៦លាននាក់នៅចន្លោះខែមករា ដល់ខែសីហា ក្នុងឆ្នាំ២០១៩នេះ ដោយបានកើនឡើង ១០.៤ភាគរយ បើធៀបនឹងតួលេខក្នុងរយៈពេលដូចគ្នាកាលពីឆ្នាំមុន។

ស្ថិតិដដែលនេះ បាន​ឱ្យដឹងទៀតថា ភ្ញៀវទេសចរចិនដល់ទៅជាង ១.៧លាននាក់ បានធ្វើដំណើរចូលមកប្រទេសកម្ពុជានៅក្នុងរយៈពេល ៨ខែកន្លងមកនេះ ឬ​កើន​ឡើង​ដល់ទៅ ៣៣.១ភាគរយ បើធៀបទៅនឹងរយៈពេលដូចគ្នាកាលពីឆ្នាំ២០១៨កន្លងមក។

សន្ទុះកំណើនភ្ញៀវទេសចរចិនបែបនេះ បានធ្វើឱ្យភ្ញៀវទេសចរចិនស្ថិតនៅចំណាត់ថ្នាក់លេខ ១ ឬមានចំណែកដល់ទៅ ៣៩​ភាគរយ​ក្នុង​ចំណោម​ភ្ញៀវ​ទេសចរ​បរទេស​មក​ពី ១០ប្រទេសផ្សេងទៀត។

បន្ទាប់ពីភ្ញៀវទេសចរចិន កម្ពុជាទទួលបានភ្ញៀវទេសចរវៀតណាមចំនួនជិត ៥៦ម៉ឺននាក់ ឬកើនឡើង ៦.៣ភាគរយ ឬក៏មានចំណែកជិត ១៣​ភាគរយ​នៃ​ចំនួន​ភ្ញៀវ​ទេសចរបរទេសសរុប។

ចំណែកឯភ្ញៀវទេសចរបរទេសដែលចូលមកកម្ពុជាច្រើនជាប់លំដាប់ថ្នាកទី៣នោះ គឺជាជនជាតិឡាវ ដែលមានចំនួនជាង ២៣ម៉ឺន ៥ពាន់នាក់ ប៉ុន្តែ បាន​ធ្លាក់​ចុះ​ដល់​ទៅ ៥.៣ភាគរយឯណោះ ខណៈដែលភ្ញៀវទេសចរថៃ មានចំនួនជាង ២៣ម៉ឺន ៤ពាន់នាក់ ឬកើនឡើង ១១.២ភាគរយ។

សម្រាបភ្ញៀវទេសចរកូរ៉េខាងត្បូង និងសហរដ្ឋអាមេរិក កម្ពុជាទទួលបានត្រឹមតែចំនួនជាង ១៧ម៉ឺននាក់ និងជាង ១៦ម៉ឺននាក់តែប៉ុណ្ណោះ ហើយបានដាំក្បាលចុះអស់ ១៧.៥ភាគរយ និង ០.៩ភាគរយនៅក្នុងរយៈពេលនេះ។

ចំនួនភ្ញៀវទេសចរបរទេសដែលចូលមកកម្ពុជាស្ថិតក្នុងលំដាប់ថ្នាក់ទី៦រហូតដល់ទី១០ គឺជាភ្ញៀវជនជាតិជប៉ុនជាង ១៣ម៉ឺននាក់ ភ្ញៀវជនជាតិម៉ាឡេស៊ីមានជាង ១២​ម៉ឺន​នាក់ ភ្ញៀវជនជាតិបារាំងមានជាង ១១ម៉ឺននាក់ និងភ្ញៀវជនជាតិអង់គ្លេសមានជាង ១១ម៉ឺននាក់ផងដែរ។

ក្នុងចំណោមភ្ញៀវទេសចរបរទេសដែលចូលមកកម្ពុជាសរុបនោះ ទេសចរបរទេសដល់ទៅ ៣ ភាគ ៤ បានចូលមកកម្ពុជាតាមមធ្យោបាយដឹកជញ្ជូនជើងអាកាស ក្នុងនោះចូលតាមច្រកអាកាសយានដ្ឋានអន្តរជាតិភ្នំពេញ មានចំនួនជាង ១.៤២លាននាក់ អកាសយានដ្ឋានអន្តរជាតិសៀមរាប មានចំនួនជាង ១.១៨លាននាក់ និងព្រលានយន្តហោះកងកេងខេត្តព្រះសីហនុ មានចំនួនជិត ៤៩ម៉ឺននាក់។

ស្របពេលជាមួយគ្នានេះដែរ ភ្ញៀវទេសចរបរទេសចូលតាមច្រកផ្លូវគោក មានចំនួនជាង ១.១៦លាននាក់ និងធ្វើដំណើរចូលមកកម្ពុជាតាមផ្លូវទឹកមានចំនួនជាង ៩​ម៉ឺន ៥ពាន់នាក់។

ថ្វីបើចំនួនភ្ញៀវទេសចរបរទេសចូលមកកម្ពុជានៅរក្សាបានកំណើនក្ដី ប៉ុន្តែ សន្ទុះកំណើនភ្ញៀវទេសចរបរទេសចូលមកប្រទេសកម្ពុជា បានធ្លាក់ចុះពីចំនួនជាង ១.៨៧​លាននាក់នៅត្រីមាសទី១ មកនៅត្រឹមចំនួនជាង ១.៤៦លាននាក់នៅត្រីមាសទី២ក្នុងឆ្នាំនេះ៕