ជិត​៣០​ឆ្នាំ​ចុង​ក្រោយ កម្ពុជា​ខ្ចី​បុល​​ពី​​បរទេស​​១២.៦៤​​ពាន់​លាន​ដុល្លារ


វិមានសន្តិភាព
អគារ​វិមាន​សន្តិភាព​ គឺ​ជា​ខុទ្ទកាល័យ​ប្រមុខ​រដ្ឋាភិបាល​កម្ពុជា​ស្ថិត​នៅ​ក្នុង​បរិវេណ​ទីស្ដីការ​គណៈរដ្ឋ​មន្ត្រី តាម​បណ្ដោយ​មហាវិថី​សហព័ន្ធ​រុស្ស៊ី ក្នុង​រាជ​ធានី​ភ្នំពេញ។ (មេគង្គ ដេលី)

សេដ្ឋកិច្ច | ជ័យ ច័ន្ទឧត្ដម | 08 Jul 2020 | 0 Comments |

បំណុល​សាធារណៈ​ដែ​ល​កម្ពុជា​បាន​ខ្ចី​ពី​បរទេស ឬ​ដៃ​គូ​អភិវឌ្ឍន៍​នានា​នៅ​ក្នុង​រយៈ​ពេល​ជិត ៣​ទសវត្សរន៍​ចុង​ក្រោយ​នេះ បាន​កើន​ឡើង​ដល់​ទំហំ​ ១២.៦៤​ពាន់​លាន​ដុល្លារ​គិតត្រឹម​ឆ្នាំ​កន្លង​មក​នេះ ដែល​ភាគ​ច្រើន​នៃ​កម្ចី​ទាំង​នោះ ត្រូវ​បាន​រដ្ឋាភិបាល​ចំណាយ​ទៅ​លើ​គម្រោង​អភិវឌ្ឍ​ហេដ្ឋា​រចនា​សម្ព័ន្ធ​។

កំណើន​នៃ​ទំហំ​បំណុល​ដែល​កម្ពុជា​បាន​ខ្ចី​ពី​បរទេស ត្រូវ​បាន​បង្ហាញ​នៅ​ក្នុង​​​ព្រឹត្តិបត្រ​ស្ថិត​បំណុល​សាធារណៈ​កម្ពុជា​​ប្រចាំ​ឆ្នាំ​២០១៩ ដែល​ចេញ​ដោយ​ក្រសួង​សេដ្ឋកិច្ច ហិរញ្ញវត្ថុ កាល​ពី​ខែ​មីនា​កន្លង​មក។

របាយការណ៍​នេះ បង្ហាញ​ថា រដ្ឋាភិបាល​កម្ពុជា​បាន​ខ្ចី​ប្រាក់​ទំហំ ១,២៨៨.២៧​លាន​ដុល្លារ​​ពី​ដៃ​គូ​អភិវឌ្ឍន៍​នានា​កាល​ពី​ឆ្នាំ​២០១៩​កន្លង​មក ក្នុង​នោះ​កម្ចី​ក្នុង​ក្រប​ខណ្ឌ​ទ្វេភាគី​មាន​ទំហំ​ ៤៨​​​​​​.៥៥​ភាគរយ ឬ​ស្មើ​នឹង​ទឹក​ប្រាក់​ប្រមាណ ៦២៥.៤៨​លាន​ដុល្លារ និង​កម្ចី​ក្រប​ខណ្ឌ​ពហុ​ភាគី មាន​ចំនួន ៥១.៤៥ភាគរយ ឬ​ស្មើ​នឹង​ប្រមាណ ៦៦២.៧៩​លាន​ដុល្លារ។

របាយការណ៍​នេះ បាន​រៀបរាប់​ថា កម្ចី​ដែល​រដ្ឋាភិបាល​កម្ពុជា​បាន​ខ្ចី​ពី​បរទេស​ដល់​ទៅ​ជាង ៨៥​ភាគរយ ត្រូវ​បាន​យក​ទៅ​វិនិយោគ​លើហេដ្ឋា​រចនា​សម្ព័ន្ធ​រូបវន្ត និង​ជាង ១៤​ភាគរយ​ទៀត សម្រាប់​វិស័យ​នានា ដែល​រដ្ឋាភិបាល​បាន​ផ្ដល់​អាទិភាព។

របាយការណ៍​ដដែល​នេះ ឲ្យ​ដឹង​ទៀត​ថា បំណុល​សាធារណៈ​ដែល​កម្ពុជា​បាន​ខ្ចី​ពី​បរទេស​គិត​ចាប់​តាំង​ពី​ឆ្នាំ​១៩៩៣​មក មាន​ទំហំ​សរុប ១២.៦៤​ពាន់​លាន​ដុល្លារ​អាមេរិក ប៉ុន្តែ របាយការណ៍​បញ្ជាក់​ថា ទំហំ​សាច់​ប្រាក់​សរុប ៨.០៨​ពាន់​លាន​ដុល្លារ​ ឬ​ជិត​ស្មើ​នឹង ៦៤​ភាគរយ​នៃ​ទំហំ​បំណុល​សរុប​របស់​កម្ពុជា ត្រូវ​បាន​រដ្ឋាភិបាល​ដក​យក​ពី​ដៃ​គូ​អភិវឌ្ឍន៍​ យក​មក​ប្រើ​ប្រាស់​ជាក់​ស្ដែង។

ផ្ទុយ​ទៅ​វិញ របាយការណ៍​នេះ ក៏​បាន​បង្ហាញ​ផង​ដែរ​ថា រដ្ឋាភិបាល​កម្ពុជា​បាន​ទូទាត់​សង​បំណុល​ទៅ​ដៃ​គូ​អភិវឌ្ឍន៍​វិញ​នូវ​ទឹក​ប្រាក់​ទំហំ​ដល់​ទៅ ១.៦៩​ពាន់​លាន​ដុល្លារ គិត​ចាប់​តាំង​ពី​ឆ្នាំ​១៩៩៣​មក ក្នុងនោះ​សង​ត្រឡប់​ទៅ​ម្ចាស់​បំណុល​បរទេស​មាន​ទំហំ​ដល់​ទៅ​ជិត ៩៩​ភាគរយ ឬ​ស្មើ​នឹង ១.៦៧​ពាន់​លាន​ដុល្លារ៕