សួន​ទឹក​កម្សាន្ត​​​បំផុត​នៅ​កម្ពុជា​​តម្លៃ​$៤៤​លាន​​បើក​ដំណើរការ​ជាផ្លូវការ


Garden City Water Park
សួន​ទឹក​កម្សាន្ត​ហ្គាឌិន ស៊ីធី ក្រោម​ការ​វិនិយោគ​ដោយ​សម្ព័ន្ធ​ LYP Group របស់​លោក​ឧកញ៉ា លី យ៉ុងផាត់ បើក​សម្ពោធ​ជា​ផ្លូវការ​នៅ​ថ្ងៃ​ទី​១៦ ខែ​សីហា ឆ្នាំ​២០២០។

ធុរកិច្ច | ជ័យ ច័ន្ទមុន្នី | 16 Aug 2020 | 0 Comments |

សួន​ទឹក​ដ៏​ធំ​មួយ​ស្ថិត​ក្នុង​តំបន់​អភិវឌ្ឍន៍​ភាគ​ខាង​ជើង​រាជ​ធានី​ភ្នំពេញ ត្រូវ​បាន​បើក​ដំណើរការ​ជា​ផ្លូវការ​ចាប់​ពី​ថ្ងៃ​នេះ បន្ទាប់​ពី​ត្រូវ​បាន​សាង​សង់​ឡើង​អស់​រយៈ​ពេល​ជាង ២​ឆ្នាំ ២​ខែ។

លោក​ឧកញ៉ា លី យ៉ុងផាត់ អគ្គនាយក​សម្ព័ន្ធ​​ក្រុមហ៊ុន LYP Group ដែល​ជា​ម្ចាស់​នៃ​គម្រោង​អភិវឌ្ឍន៍​សួន​ទឹក​ហ្គាឌិនស៊ីធី បាន​ថ្លែង​ថា សួន​ទឹក​នេះ​ត្រូវ​បាន​បំពាក់​ទៅ​ដោយ​ឧបករណ៍​កម្សាន្ត​ទំនើបៗ​ និង​បច្ចេកវិទ្យា​ចុង​ក្រោយ ដែល​ធានា​បាន​ទាំង​គុណភាព និង​សុវត្ថិភាព​សម្រាប់​ភ្ញៀវ​ចូល​លេង​កម្សាន្ត។

លោក​ឧកញ៉ា លី យ៉ុងផាត់ ថ្លែង​ថា​៖ «នេះ​គឺ​ជា​សួន​ទឹក​លំដាប់​អន្តរជាតិ​ធំ​ជាង​គេ​បង្អស់​នៅ​កម្ពុជា មាន​ឧបករណ៍​សម្រាប់​លេង​កម្សាន្ត ៣៨​ប្រភេទ ដែល​សុទ្ធ​សឹង​ជា​ឧបករណ៍​ទំនើប​ទាន់​សម័យ និង​បំពាក់​ដោយ​បច្ចេកវិទ្យា​ទំនើប​ចុង​ក្រោយ​បំផុត​ដោយ​ធានាបាន​ទាំង​គុណភាព និង​សុវត្ថិភាព​ខ្ពស់​សម្រាប់​អ្នក​មក​លេង​កម្សាន្ត»

លោក​ឧកញ៉ា លី យ៉ុងផាត់ ថ្លែង​ទៀត​ថា សួន​ទឹក​កម្សាន្ត​ដ៏​ធំ​នេះ អាច​ទទួល​ភ្ញៀវ​ចូល​លេង​កម្សាន្ត​បាន​ដល់​ទៅ ៧​,០០០​នាក់​ក្នុង​មួយ​ថ្ងៃៗ ប៉ុន្តែ លោក​បញ្ជាក់​ថា ក្រុមហ៊ុន​របស់​លោក​បាន​កំណត់​ចំនួន​អ្នក​ចូល​លេង​កម្សាន្ត​ត្រឹម​តែ ៥០​ភាគរយ​ប៉ុណ្ណោះ​​ក្នុង​មួយ​ថ្ងៃៗ ដើម្បី​ទប់​ស្កាត់​ការ​ឆ្លង​រីក​រាល​ដាល​នៃ​ជំងឺ​ខូវីដ​១៩នា​ពេល​សព្វ​ថ្ងៃ​នេះ។

សួន​ទឹក​«ហ្គាឌិនស៊ីធី» ត្រូវ​បាន​អភិវឌ្ឍ​ឡើង​ដោយ​សម្ព័ន្ធ​ក្រុមហ៊ុន LYP Group ជាមួយ​ទឹក​ប្រាក់​វិនិយោគ​ដល់​ទៅ ៤៤​លាន​ដុល្លារ​នៅ​លើ​ផ្ទៃ​ដី​ទំហំ​ ៨.៦​​ហិកតា ស្ថិត​នៅ​សង្កាត់​ព្រែកតាសែក ក្នុង​ខណ្ឌ​ជ្រោយចង្វារ៕