កម្ពុជា​បិទ​ការ​ធ្វើ​ដំណើរ​ឆ្លង​ខេត្ត និង​​តំបន់​ទេសចរណ៍​​បណ្ដោះ​អាសន្ន


ផ្លូវ​ឆ្ពោះ​ទៅ​កាន់​ខេត្ត​បាត់ដំបង
ពលរដ្ឋ​ធ្វើ​ដំណើរ​ឆ្ពោះ​ទៅ​កាន់​ខេត្ត​បាត់ដំបង​កាល​ពី​ខែ​កុម្ភៈ ឆ្នាំ​២០២១។ (មេគង្គ ដេលី)

​កម្ពុជា | ជ័យ ច័ន្ទឧត្ដម | 06 Apr 2021 | 0 Comments |

រាជ​រដ្ឋាភិបាល​បាន​សម្រេច​ហាម​ឃាត់​ការ​ធ្វើ​ដំណើរ​ឆ្លង​ខេត្ត​មួយ​ទៅ​ខេត្ត​មួយ និង​បិទ​តំបន់​ទេសរណ៍​ទូទាំង​ប្រទេស​រយៈ​ពេល ១៤​ថ្ងៃ​ចាប់​ពី​ថ្ងៃ​ស្អែក​នេះ​ទៅ ដោយ​ថា ដើម្បី​ទប់​ស្កាត់​ការ​ឆ្លង​រីក​រាល​ដាល​នៃ​មេរោគ​កូវីដ​១៩ នេះ​បើ​តាម​សេចក្ដី​សម្រេច​នេះ ត្រូវ​បាន​ធ្វើ​ឡើង​ដោយ​ប្រមុខ​រាជ​រដ្ឋាភិបាល​កម្ពុជា សម្ដេចតេជោ ហ៊ុន សែន នៅ​ថ្ងៃ​នេះ។

ក្នុង​សេចក្ដី​សម្រេច​នោះ សម្ដេច​តេជោ​នាយក​រដ្ឋ​មន្ត្រី ហ៊ុន សែន បាន​សម្រេច​ហាម​ឃាត់​ការ​ធ្វើ​ដំណើរ​ចេញ​-ចូល​ពី​ខេត្ត​មួយ​ទៅ​ខេត្ត​មួយ​ទៀត​ជា​បណ្ដោះ​អាសន្ន​ចាប់​ពី​ថ្ងៃ​ទី៧ រហូត​ដល់​ថ្ងៃ​ទី​២០ ខែ​មេសា។

ប៉ុន្តែ ប្រមុខ​រាជ​រដ្ឋាភិបាល​កម្ពុជា​បាន​អនុញ្ញាត​ឱ្យ​មាន​ការ​ធ្វើ​ដំណើរ​ចេញ​ចូល​ទៅ​មក​រវាង​ខេត្ត​កណ្ដាល និង​រាជ​ធានី​ភ្នំពេញ​ដដែល។

ជាង​នេះ​ទៀត សេចក្ដី​សម្រេច​នេះ ក៏​បាន​លើក​លែង​ចំពោះ​ការ​ធ្វើ​ដំណើរ​មួយ​ចំនួន​ដូច​ខាង​ក្រោម៖

  1. ការ​ដឹក​ជញ្ជូន​ទំនិញ​គ្រប់​ប្រភេទ​តាម​ផ្លូវ​គោក ផ្លូវ​ទឹក និង​ផ្លូវ​ដែក
  2. ការ​ធ្វើ​ដំណើរ​របស់​មន្ត្រី​រាជការ​សាធារណៈ​ទាំង​ថ្នាក់​ជាតិ និង​ថ្នាក់​ក្រោម​ជាតិ​ក្នុង​គោល​ដៅ​បំពេញ​ការងារ​ប្រចាំ​ថ្ងៃ ដោយ​ត្រូវ​បង្ហាញ​ដល់​កង​កម្លាំង​មាន​សមត្ថកិច្ច​ត្រួត​ពិនិត្យ​នូវ​ប័ណ្ណ​សម្គាល់​ការងារ​របស់​ខ្លួន ឯកសារ​បេសកកម្ម និង​ឯកសារ​ពាក់​ព័ន្ធ​ផ្សេង​ទៀត
  3. ការធ្វើដំណើរ​របស់​កង​កម្លាំង​ប្រដាប់​អាវុធ​គ្រប់​ប្រភេទ​ក្នុង​គោល​ដៅ​បំពេញ​ភារកិច្ច​របស់​ខ្លួន ដោយ​រួម​ទាំង​ការ​ដឹក​ជ្្ជុន​ពលករ​ដែល​ធ្វើ​ដំណើរ​វិល​ត្រឡប់​ពី​ក្រៅ​ប្រទេស​ចូល​មក​ក្នុង​ព្រះ​រាជាណាចក្រ​កម្ពុជា ទៅ​កាន់​ស្រុក​កំណើត​ក្នុង​គោល​បំណង​ដើម្បី​ធ្វើ​ចត្តាឡីស័ក
  4. រថយន្ត​សង្គ្រោះ​បន្ទាន់​របស់​មន្ទីរ​ពេទ្យ​រដ្ឋ និង​ឯកជន
  5. រថយន្ត​ពន្លត់​អគ្គីភ័យ
  6. រថយន្ត​បម្រើ​សេវា​ដឹក​ជញ្ជូន​សំរាម និង​កាក​សំណល់
  7. ការ​ដឹក​ជញ្ជូន​កម្មករ​ទៅ​កាន់​ទីកន្លែង​ការងារ​នៅ​តាម​រោងចក្រ​-សហគ្រាស ដែល​ត្រូវ​មាន​ប័ណ្ណ​អនុញ្ញាត​ចេញ​ដោយ​ក្រសួង​ការងារ និងបណ្ដុះ​បណ្ដាល​វិជ្ជា​ជីវៈ ឬ​មន្ទីរ​ការងារ និង​បណ្ដុះ​បណ្ដាល​វិជ្ជា​ជីវៈ
  8. ការ​ធ្វើ​ដំណើរ​របស់​ពលរដ្ឋ​ទៅ​កាន់​មន្ទីរ​ពេទ្យ ឬ​មណ្ឌល​សុខភាព​ដែល​នៅ​ជិត​បំផុត ដើម្បី​ទទួល​បាន​នូវ​សេវា​សុខភាព​ចាំ​បាច់ និង​បន្ទាន់​ ដោយ​កំណត់​ចំនួន​មនុស្ស​មិន​ឱ្យ​លើស​ពី ៤​នាក់​សម្រាប់​ករណី​នីមួយៗ និង
  9. ការ​ធ្វើ​ដំណើរ​ដោយ​មូល​ហេតុ​ចាំ​បាច់​ផ្សេង​ទៀត​ដោយ​មាន​ការ​អនុញ្ញាត​ពី​អាជ្ញាធរ​មាន​សមត្ថកិច្ច។

ក្រៅ​ពី​ហាម​ឃាត់​ការ​ធ្វើដំណើរ​ឆ្លង​ខេត្ត​មួយ​ទៅ​ខេត្ត​មួយ​ទៀត​ហើយ​នោះ រាជ​រដ្ឋាភិបាល​ក៏​បាន​សម្រេច​បិទ​តំបន់​ទេសចរណ៍​ទូទាំង​ប្រទេស​ជា​បណ្ដោះ​អាសន្ន​រយៈ​ពេល ១៤​ថ្ងៃ​ផង​ដែរ។

ប្រមុខ​រាជ​រដ្ឋាភិបាល​កម្ពុជា សម្ដេច​តេជោ ហ៊ុន សែន បាន​បញ្ជាក់​​ក្នុង​សេចក្ដី​សម្រេច​នោះ​ថា ការ​សម្រេច​បែប​នេះ​គឺ​ដើម្បី​ទប់​ស្កាត់​ការ​ឆ្លង​រីក​រាល​ដាល​នៃ​មេរោគ​កូវីដ​១៩។

គិត​ត្រឹម​ថ្ងៃ​នេះ កម្ពុជា​រក​ឃើញ​មនុស្ស​សរុប​ដល់​ទៅ ២ ៨២៤​នាក់​ហើយបាន​ឆ្លង​វីរុស​កូវីដ​១៩​នៅ​ទូទាំង​ប្រកាស​គិត​ចាប់​តាំង​ពី​ប្រទេស​នេះ​រក​ឃើញ​ករណី​ឆ្លង​លើក​ដំបូង​កាល​ពី​ចុង​ខែ​មករា​ឆ្នាំ​មុន ក្នុង​នោះ​ករណី​ឆ្លង​ដ៏​ច្រើន​លើស​លប់​ដល់​ទៅ ២ ២៩៣​ករណី​ពាក់​ព័ន្ធ​នឹង​ព្រឹត្តិការណ៍​សហគមន៍​២០​កុម្ភៈ​។

ទន្ទឹមគ្នា​នេះ​ ក្រសួង​សុខាភិបាល​បញ្ជាក់​​ថា អ្នក​ជំងឺ​កូវីដ​សរុប​ដល់​ទៅ ១ ៧៩៤​នាក់​ហើយ ត្រូវ​បាន​ព្យាបាល​ជា​សះ​ស្បើយ និង​ត្រូវ​បាន​អនុញ្ញាតឱ្យ​ចាក​ចេញ​ពី​មន្ទីរ​ពេទ្យ ក្នុង​នោះ​រួម​បញ្ចូល​ទាំង​អ្នក​ជា​សះ​ស្បើយ​ថ្មី ៤៧​​នាក់​ដែល​ក្រសួង​ទើប​ប្រកាស​នៅ​ថ្ងៃ​នេះ​ផងដែរ៕