កម្ពុជា​រក​ឃើញ​មនុស្ស​​​​ ២​នាក់​ទៀត​ឆ្លង​វីរុស​ក្រោយ​ត្រឡប់​ពី​ម៉ាឡេស៊ី


មន្ទីរពេទ្យ​មង្គលបូរី
ក្រុម​​មន្ត្រី​សុខាភិបាល​បាញ់​ថ្នាំ​សម្លាប់​មេរោគ ឬ​វីរុស​នៅ​ក្នុង​បរិវេណ​មន្ទីរ​ពេទ្យ​មិត្តភាព​កម្ពុជា-ជប៉ុន​មង្គលបូរី ស្ថិត​ក្នុង​ខេត្ត​បន្ទាយមានជ័យ កាល​ពី​ខែ​មេសា ឆ្នាំ​២០២០។ (មន្ទីរ​ពេទ្យ​មង្គលបូរី)

​កម្ពុជា | ជ័យ ច័ន្ទឧត្ដម | 28 Jun 2020 | 0 Comments |

កម្ពុជា​បាន​ប្រកាស​ពី​ការ​រក​ឃើញ​មនុស្ស ២​នាក់​ទៀត​ឆ្លង​វីរុស​កូរ៉ូណា ដែល​នាំ​ឲ្យ​ចំនួន​ឆ្លង​សរុប​ដែល​រក​ឃើញ​នៅ​ក្នុង​ប្រទេស​នេះ​ កើន​ឡើង​ដល់ ១៤១​ករណី​ហើយ​គិត​ត្រឹម​ថ្ងៃ​នេះ។

ក្នុង​សេចក្ដី​ប្រកាស​ព័ត៌មាន​នៅ​ព្រឹក​ថ្ងៃ​នេះ ក្រសួង​សុខាភិបាល​បាន​និយាយ​ថា បុរស​កម្ពុជា ២​នាក់ អាយុ ២៣​ឆ្នាំ និង ១៥​ឆ្នាំ ត្រូវ​បាន​ធ្វើ​តេស្ត​កាល​ពី​ថ្ងៃ​ម្សិលមិញ​នេះ ហើយ​លទ្ធផល​បង្ហាញ​ថា ពួកគេ​បាន​ឆ្លង​វីរុស​កូរ៉ូណា ឬ​ខូវីដ-១៩។

ក្រសួង​បញ្ជាក់​ថា បុរស​កម្ពុជា​ទាំង ២​នាក់​នេះ ដែល​ម្នាក់​មាន​អាសយដ្ឋាន​នៅ​ភូមិ​អំពិល ស្ថិត​ក្នុង​ស្រុក​ក្រូចឆ្មារ ខេត្ត​ត្បូងឃ្មុំ និង​ម្នាក់​ទៀត​មាន​អាសយដ្ឋាន​នៅ​ភូមិ​ព្រែកតាខ្មៅ ឃុំ​ដើមមាន ក្រុង​តាខ្មៅ ខេត្ត​កណ្ដាល បាន​ធ្វើ​ដំណើរ​វិល​ត្រឡប់​ពី​ប្រទេស​ម៉ាឡេស៊ី​មក​ដល់​កម្ពុជា​កាល​ពី​​ថ្ងៃ​ទី​២៦ ខែ​មិថុនា។

បើ​តាម​ក្រសួង​សុខាភិបាល បុរស​ទាំង ២​នាក់​នេះ ត្រូវ​បាន​បញ្ជូន​ទៅ​ដាក់​ឲ្យ​ស្ថិត​ក្រោម​ការ​ព្យាបាល​ដាច់​ដោយ​ឡែក​នៅ​មណ្ឌល​សុខភាព​ចាក់អង្រែ ស្ថិត​នៅ​រាជ​ធានី​ភ្នំពេញ។

ក្រសួង​សុខាភិបាល ឲ្យ​ដឹង​ទៀត​ថា អ្នក​ដំណើរ​ ១០៥​នាក់​ផ្សេង​ទៀត ក្នុង​នោះ​មាន​អ្នក​ដំណើរ​ជន​ជាតិ​ម៉ាឡេស៊ី ២​នាក់​ផង​ដែរ បាន​ធ្វើ​ដំណើរ​តាម​ជើង​ហោះ​ហើរ​រួម​គ្នា​ជាមួយ​បុរស​កម្ពុជា ២​នាក់ ដែល​ត្រូវ​បាន​រក​ឃើញ​ឆ្លង​វីរុស​។

បើ​តាម​ក្រសួង​ អ្នក​ដំណើរ​ជា​ជន​ជាតិ​កម្ពុជា ១០៣​នាក់ ត្រូវ​បាន​ធ្វើ​តេស្ត និង​រក​មិន​ឃើញ​វីរុស​កូរ៉ូណា​នោះ​ឡើយ ប៉ុន្តែ ពួកគេ​ត្រូវ​បាន​ដាក់​ឲ្យ​ស្ថិត​ក្រោម​ការ​តាម​ដាន​ដាច់​ដោយ​ឡែក​នៅ​មណ្ឌល​ស្នាក់នៅ​ដាច់​ដោយ​ឡែក​ជម្ពូវ័ន​១ នៅ​ជាយ​ខាង​ត្បូង​រាជ​ធានី​ភ្នំពេញ មុន​នឹង​ត្រូវ​បញ្ជូន​ទៅ​ស្នាក់នៅ​ដាច់​ដោយ​ឡែក​នៅ​តាម​មណ្ឌល​ស្នាក់នៅ​ដាច់​ដោយ​ឡែក​ស្ថិត​នៅ​តាម​បណ្ដា​ខេត្ត​ដែល​ពួកគេ​រស់​នៅ។

សម្រាប់​ជន​ជាតិ​ម៉ាឡេស៊ី ២​នាក់​នោះ​វិញ ក្រសួង​សុខាភិបាល​បញ្ជាក់​ថា ត្រូវ​បាន​បញ្ជូន​ទៅ​ដាក់​ឲ្យ​ស្នាក់នៅ​ដាច់​ដោយ​ឡែក​រយៈ​ពេល ១៤​ថ្ងៃ​​នៅ​សណ្ឋាគារ​មួយ​ក្នុង​រាជ​ធានី​ភ្នំពេញ។

សរុប​ត្រឹម​ថ្ងៃ​នេះ កម្ពុជា​បាន​រក​ឃើញ​មនុស្ស ១៤១​នាក់​ហើយ បាន​ឆ្លង​វីរុស​កូរ៉ូណា ប៉ុន្តែ មនុស្ស ១២៩​នាក់​ហើយ ត្រូវ​បាន​ក្រសួង​សុខាភិបាល​ប្រកាស​ថា បាន​ជា​សះ​ស្បើយ ហើយ​ចាក​ចេញ​ពី​មន្ទីរ​ពេទ្យ​អស់​ហើយ៕