ស្ថានភាព​កូវីដ​១៩​ថ្ងៃ​នេះ រាជ​ធានី​ភ្នំពេញ​រក​ឃើញ​​​អ្នក​ឆ្លង​ច្រើន​​ជាង​គេ​


ពលរដ្ឋ​នៅ​រាជ​ធានី​ភ្នំពេញ
ពលរដ្ឋ​ជាច្រើន​នាក់​នៅ​ក្នុង​សង្កាត់​ទន្លេបាសាក់ ទទួល​ម្ហូប​អាហារ​ពី​អាជ្ញាធរ​រាជ​ធានី​ភ្នំពេញ​កាល​ពី​ថ្ងៃ​ទី​០៦ ខែ​មេសា ឆ្នាំ​២០២១ ​អំឡុង​ពេល​​ស្ថិត​នៅ​ដាច់​ដោយ​ឡែក។ (រដ្ឋបាល​រាជ​ធានី​ភ្នំពេញ)

​កម្ពុជា | ជ័យ ច័ន្ទឧត្ដម | 07 Apr 2021 | 0 Comments |

ក្រសួង​សុខាភិបាល​បាន​ប្រកាស​ពី​ការ​រក​ឃើញ​មនុស្ស ៩១​នាក់​ទៀត​​ត្រូវ​បាន​រក​ឃើញ​ឆ្លង​មេរោគ​កូវីវ​១៩ ក្នុង​នោះ​រាជ​ធានី​ភ្នំពេញ​មាន​អ្នក​ឆ្លង​ថ្មី​ច្រើន​ជាង​គេ​បំផុត។

ក្នុង​សេចក្ដី​ប្រកាស​ព័ត៌មាន​នៅ​ព្រឹក​ថ្ងៃ​នេះ ក្រសួង​សុខាភិបាល​បាន​ប្រកាស​ថា អ្នក​ឆ្លង​ថ្មី ៩០​ករណី ត្រូវ​បាន​រក​ឃើញ​លើ​មនុស្ស​ដែល​ជាប់​ពាក់​ព័ន្ធ​នឹង​ការ​ឆ្លង​ក្នុង​សហគមន៍ ២០​កុម្ភៈ​ ហើយ ១​ករណី​ទៀត គឺ​ជា​ការ​នាំ​ចូល​ពី​ក្រៅ​ប្រទេស ដែល​ត្រូវ​បាន​រក​ឃើញ​លើ​បុរស​ជន​ជាតិ​ឥណ្ឌូនេស៊ី​អាយុ ៣៣​ឆ្នាំ ដែល​បាន​ធ្វើ​ដំណើរ​មក​ដល់​កម្ពុជា​កាល​ពី​ថ្ងៃ​ចន្ទ​កន្លង​មក​នេះ។

បើ​តាម​សេចក្ដី​ប្រកាស​ព័ត៌មាន​ដដែល ក្រសួង​សុខាភិបាល​រក​ឃើញ​អ្នក​​ឆ្លង​ថ្មី ៧៨​នាក់​នៅ​រាជ​ធានី​ភ្នំពេញ តាកែវ ៤​នាក់ ស្វាយ​រៀង ៣​នាក់ និង​រក​ឃើញ ១​ករណី​ៗ​នៅ​ក្នុង​ខេត្ត​ត្បូងឃ្មុំ កំពង់ចាម ព្រៃវែង ពោធិ៍សាត់ និង​ខេត្ត​ប៉ៃលិន។

ក្រសួង​ក៏​បាន​ប្រកាស​ផង​ដែរ​ថា អ្នក​ជំងឺ​កូវីដ​១៩​ចំនួន ៣០​នាក់​ទៀត ត្រូវ​បាន​ព្យាបាល​ជា​សះស្បើយ ហើយ​ត្រូវ​បាន​អនុញ្ញាត​ឱ្យ​ចាក​ចេញ​ពី​មន្ទីរ​ពេទ្យ​ហើយ ដែល​នាំ​ឱ្យ​ចំនួន​អ្នក​ជា​សះ​ស្បើយ​សរុប​កើន​ឡើង​ដល់​ ១ ៨២៤​នាក់។

កម្ពុជា​បាន​រក​ឃើញ​រក​មនុស្ស​សរុប​ដល់​ទៅ ២ ៩១៥​នាក់​ហើយ​បាន​ឆ្លង​មេរោគ​កូវីដ​១៩​នៅ​ទូទាំង​ប្រទេស​គិត​ចាប់​តាំង​ពី​ផ្ទុះ​ករណី​ដំបូង​កាល​ពី​ថ្ងៃ​ទី​២៧ ខែ​មករា ឆ្នាំ​២០២០ ក្នុង​នោះ​មនុស្ស​សរុប​ដល់​ទៅ ១ ០៦៤​នាក់​ទៀត កំពុង​ស្ថិត​ក្រោម​ការ​ព្យាបាល​បន្ត​នៅ​ឡើយ៕