កម្ពុជា​ស្ថិត​ក្នុង​ក្ដី​បារម្ភ​ជា​ថ្មី​ក្រោយ​ផ្ទុះ​​ករណី​ឆ្លង​​សហគមន៍​លើក​ដំបូង


សម្ដេច​តេជោ ហ៊ុន សែន
សម្ដេច​តេជោ ហ៊ុន សែន នាយក​រដ្ឋ​មន្ត្រី​កម្ពុជា និង​មន្ត្រី​ជាន់​ខ្ពស់​កម្ពុជា​ដទៃ​ទៀត ពាក់​ម៉ាស់​ការពារ​ការ​ចម្លង​វីរុស​កូរ៉ូណា​អំឡុង​ពិធី​មួយ​នា​ពេល​កន្លងមក​។

​កម្ពុជា | ជ័យ ច័ន្ទឧត្ដម | 30 Nov 2020 | 0 Comments |

ប្រទេស​កម្ពុជា​បាន​វិល​ត្រឡប់​ទៅ​រក​ស្ថានភាព​ស្ថិត​ក្នុង​​ក្ដី​បារម្ភ​ឡើង​វិញ បន្ទាប់​ពី​បាន​រក​ឃើញ​ស្ត្រី​ម្នាក់​ឆ្លង​វីរុស​កូរ៉ូណា ដែល​មិន​ត្រូវ​បាន​គេ​ដឹង​ប្រភព​ចម្លង​ច្បាស់​លាស់ ហើយ​ត្រូវ​បាន​ចាត់​ទុក​ជា​ការ​ករណី​ឆ្លង​ក្នុង​សហគមន៍​ជា​លើក​ដំបូង។

ស្ត្រី​ម្នាក់​វ័យ ៥៦​ឆ្នាំ​ជា​ភរិយា​របស់​លោក ឆែម សាវុធ ដែល​មាន​តួនាទី​ជា​អគ្គនាយក​នៃ​អគ្គនាយកដ្ឋាន​ពន្ធនាគារ​ស្ថិត​ក្រោម​ចំណុះ​ក្រសួង​មហាផ្ទៃ​នោះ ត្រូវ​បាន​ធ្វើ​តេស្ត​រក​ឃើញ​ឆ្លង​វីរុស​កូរ៉ូណា​កាល​ពី​ថ្ងៃ​អាទិត្យ​កន្លង​មក​នេះ ប៉ុន្តែ ប្រភព​នៃ​ការ​ឆ្លង​នេះ​មិន​ត្រូវ​បាន​គេ​ដឹង​នៅ​ឡើយ​ទេ។

ក្រោយ​ពី​ភរិយា​របស់​លោក​បាន​ឆ្លង​វីរុស​កូរ៉ូូណា​ហើយ​នោះ ក្រសួង​សុខាភិបាល​ក៏​បាន​រក​ឃើញ​ផង​ដែរ​ថា លោក ឆែម សាវុធ ផ្ទាល់ និង​មនុស្ស​យ៉ាង​ហោច​ណាស់ ១៣​នាក់​ទៀត ដែល​ជា​សមាជិកក្រុម​គ្រួសារ និង​អ្នក​ពាក់​ព័ន្ធ​នឹង​មន្ត្រី​រូប​នេះ បាន​ឆ្លង​វីរុស​កូរ៉ូណា​ផង​ដែរ។

ក្រោយ​ផ្ទុះ​ករណី​ឆ្លង​នេះ​ភ្លាម សម្ដេច​តេជោ ហ៊ុន សែន នាយក​រដ្ឋ​មន្ត្រី​កម្ពុជា បាន​ចាត់​ទុក​ករណី​នេះ​ជា​ «ករណី​ឆ្លង​ក្នុង​សហគមន៍​ជា​លើក​ដំបូង» ក៏​ព្រោះ​តែ​ភរិយា​របស់​លោក ឆែម សាវុធ មិន​បាន​ធ្វើ​ដំណើរ​ទៅ​ក្រៅ​ប្រទេស​នោះ​ឡើយ។

ភ្លាមៗ​ក្រោយ​រក​ឃើញ​ករណី​នេះ សម្ដេច​តេជោ ហ៊ុន សែន ក៏​បាន​អំពាវ​នាវ​ដល់​មន្ត្រី​ជាន់​ខ្ពស់ និង​អ្នក​ពាក់​ព័ន្ធ​ទាំង​ឡាយ ឱ្យ​ធ្វើ​តេស្ត​ពិនិត្យ​សុខភាព និង​រក្សា​ខ្លួន​ដាច់​ដោយ​ឡែក​យ៉ាង​តិច ១៤​ថ្ងៃ ដើម្បី​ពិនិត្យ​តាម​ដាន​សុខភាព។

មុន​ការ​រក​ឃើញ​ថា ភរិយា​របស់​លោក​ផ្ទុក​វីរុស​កូរ៉ូណា​នោះ លោក ឆែម សាវុធ បាន​ជួប​ប្រជុំ​ជាមួយ​មន្ត្រី​ជាន់​ខ្ពស់​ក្នុង​ជួរ​រដ្ឋាភិបាល ក្នុង​នោះ​មាន​កិច្ច​ប្រជុំ​ជាមួយ​ឧប​នាយករដ្ឋ​មន្ត្រី​ក្រសួង​មហាផ្ទៃ សម្ដេច​ក្រឡាហោម ស ខេង និង​រដ្ឋ​មន្ត្រី​ក្រសួង​យុត្តិធម៌ លោក កើត រិទ្ធ និង​មន្ត្រី​ពន្ធនាគារ​ផង​ដែរ។

នៅ​ឯ​ពិធី​បើក​ការដ្ឋាន​សាង​សង់ និង​កែ​លម្អ​ផ្លូវ​នៅ​ក្រុង​សៀមរាប​នៅ​ព្រឹក​ថ្ងៃ​នេះ សម្ដេច​តេជោ ហ៊ុន សែន ថ្លែង​ថា កម្ពុជា​អាច​នឹង​ប្រឈម​មុខ​នឹង​មហន្តរាយ​ធំ​ធេង ប្រសិន​បើ​មិន​អាច​គ្រប់​គ្រង​បាន​នូវ​ការ​ឆ្លង​រីក​រាល​ដាល​នៃ​ករណី​នេះ​ដែល​សម្ដេច​ហៅ​ថា «ព្រឹត្តិការណ៍ ២៨​វិច្ឆិកា​»។

សម្ដេច​តេជោ ហ៊ុន សែន ថ្លែង​ថា​៖ «ព្រោះ​នេះ វា​ធំ​ធេង​ជាង​សង្គ្រាម​ទល់​ដែន។ សង្គ្រាម​ទល់​ដែន វាមាន​ម៉ោង​មាន​ពេល​របស់​វា ប៉ុន្តែ សង្គ្រាម​ប្រឆាំង​កូវីដ​ អត់​មាន​ពេល​វេលា»

ជាមួយ​ក្ដី​បារម្ភ​នេះ សម្ដេច​តេជោ ហ៊ុន សែន បាន​សម្រេច​បញ្ចេញ​ថវិកា​ខ្ទង់ ៣០​ម៉ឺន​ដុល្លារ​សម្រាប់​ជួយ​ដល់​ពលរដ្ឋ​ក្រី​ក្រី ២​ម៉ឺន​រៀល​ក្នុង​មួយ​គ្រួសារ ​ដែល​ត្រូវ​ពិនិត្យ​សុខភាព និង​ព្យាបាល​ជំងឺ​អំឡុង​ពេល​ធ្វើ​ចត្តាឡីស័ក និង​សម្រាក​ព្យាបាល​នៅ​មន្ទីរ​ពេទ្យ។

ក្រោយ​ផ្ទុះ​ករណី​ឆ្លង​ក្នុង​សហគមន៍​បែប​នេះ រដ្ឋាភិបាល​បាន​សម្រេច​ហាម​ឃាត់​ការ​ជួប​ជុំ​មនុស្ស​លើស​ពី ២០​នាក់ ក្នុង​ហាម​ឃាត់​ទាំង​ពិធី​មង្គល​ការ​ផង​ដែរ​នៅ​រាជ​ធានី​ភ្នំពេញ និង​ខេត្ត​សៀមរាប។

រាល់​សវនាការ​ទាំង​អស់​នៅ​សាលា​ដំបូង​រាជ​ធានី​ភ្នំពេញ ត្រូវ​បាន​ផ្អាក​ទាំង​អស់ លើក​លែង​តែ​សេវា​រដ្ឋបាល​តែ​ប៉ុណ្ណោះ ដែល​នៅ​រក្សា​ដំណើរការ​ធម្មតា។ ចំណែក​ឯ​សារមន្ទីរ រោងភាពយន្ត និង​ការ​សម្ដែង​សិល្បៈ​នានា ដែល​ធ្លាប់​ត្រូវ​បាន​​ផ្អាក​២​លើក​រួច​មក​ហើយ​នោះ ត្រូវ​បាន​រដ្ឋាភិបាល​ណែនាំ​ឱ្យ​ផ្អាក​ជា​លើក​ទី​៣​រយៈ​ពេល​ ១៥​ថ្ងៃ។

សម្រាប់​វិស័យ​អប់រំ​វិញ ក្រសួង​អប់រំ យុវជន និង​កីឡា បាន​សម្រេច​បញ្ចប់​ឆ្នាំ​សិក្សា​២០១៩-២០២០​នៅ​ត្រឹម​ថ្ងៃ​នេះ ហើយ​ពន្យារ​ពេល​បើក​បវេស្សនកាល​ថ្មី​រហូត​ដល់​ខែ​មករា​ឆ្នាំ​ក្រោយ ប៉ុន្តែ​ ក្រសួង​អនុញ្ញាត​ឱ្យ​ការ​ប្រឡង​សញ្ញាប័ត្រ​មធ្យម​សិក្សា​បឋម​ភូមិ ដែល​ត្រូវធ្វើ​នៅ​ថ្ងៃ​នេះ ត្រូវ​បន្ត​ដំណើរការ​ទៅ​តាម​ធម្មតា​ជាមួយ​ការ​ប្រុង​ប្រយ័ត្ន​ខ្ពស់ ហើយ​ការ​ប្រឡង​បាក់ឌុប​នា​ខែ​ធ្នូ នឹង​ត្រូវ​រក្សា​ទុក​ដដែល។

បណ្ដា​ក្រសួង និង​ស្ថាប័ន​មួយ​ចំនួន ត្រូវ​បាន​សម្រេច​ឱ្យ​ផ្អាក​ជា​បណ្ដោះ​អាសន្ន​សិន ហើយ​មន្ត្រី​បម្រើការ​នៅ​ក្រសួង ឬ​ស្ថាប័ន​ពាក់​ព័ន្ធ​នឹង​ករណី​នេះ ត្រូវ​បាន​តម្រូវ​ឱ្យ​រក្សា​ខ្លួន​នៅ​ដាច់​ដោយ​ឡែក ដើម្បី​តាម​ដាន​ស្ថានភាព​សុខភាព​របស់​ពួកគេ។

ចំនួន​មនុស្ស​ ១៤​នាក់​ហើយ​​ដែល​ពាក់​ព័ន្ធ​នឹង​ភរិយា​របស់​លោក ឆែម សាវុធ ត្រូវ​បាន​ធ្វើ​តេស្ត និង​រក​ឃើញ​ឆ្លង​វីរុស​កូរ៉ូណា​នៅ​ក្នុង​រយៈ​ពេល ២​ថ្ងៃ​ចុង​ក្រោយ​មក​នេះ ប៉ុន្តែ សម្ដេច​តេជោ ហ៊ុន សែន ថ្លែង​ថា កូន​ស្រី​របស់​លោក ឆែម សាវុធ អាច​ជា​មនុស្ស​ទី​១៥ ដែល​បាន​ឆ្លង​វីរុស​នៅ​ក្នុង​ករណី​ឆ្លង​ក្នុង​សហគមន៍​នេះ។

ក្រសួង​សុខាភិបាល បាន​ប្រកាស​ថា គិត​ត្រឹម​ថ្ងៃ​ម្សិល​មិញ​នេះ សំណាក​យក​ពី​មនុស្ស​ដល់​ទៅ ៣,៣៣២​នាក់​ ត្រូវ​បាន​យក​ទៅ​វិភាគ ប៉ុន្តែ សំណាក​ទើប​តែ ២,២៤៨ ត្រូវ​បាន​ធ្វើ​តេស្ត​រួច​រាល់​ហើយ​នៅ​ត្រឹម​ព្រឹក​ថ្ងៃ​ចន្ទ​នេះ៕