ព្រោះ​​ខូវីដ​១៩ ការ​លក់​ទំនិញ​ថ្ងៃ Black Friday ធ្លាក់​ចុះ​យ៉ាង​គំហុក​​


Black Friday
ប្រជា​ពលរដ្ឋ​អាមេរិក​កាត់​បន្ថយ​ការ​ដើរ​ផ្សារ​នៅ​ចំ​ព្រឹត្តិការណ៍ Black Friday ហើយ​ងាក​ទៅ​បញ្ជា​ទិញ​ទំនិញ​តាម​អនឡាញ​វិញ ព្រោះតែ​ក្ដី​បារម្ភ​អំពី​វីរុស​កូរ៉ូណា។

​អន្តរ​​ជាតិ | ជ័យ ច័ន្ទមុន្នី | 30 Nov 2020 | 0 Comments |

ជា​រៀង​រាល់​ឆ្នាំ ព្រឹត្តិការណ៍​បញ្ចុះ​តម្លៃ​ Black Friday នៅ​សហរដ្ឋ​អាមេរិក តែង​តែ​បង្ហាញ​ឱ្យ​ឃើញ​ពី​កំណើន​នៃ​ទំហំ​ចំណាយ​របស់​មនុស្ស​ម្នា​ទៅ​លើ​ទំនិញ​គ្រប់​ប្រភេទ​អំឡុង​ពេល​ចុង​ឆ្នាំ​នេះ ប៉ុន្តែ នៅ​ឆ្នាំ​នេះ ខុស​ពី​ឆ្នាំ​មុនៗ​ដាច់ ដោយ​ការ​លក់​ទំនិញ​នៅ​ថ្ងៃ Black Friday នេះ​ស្ងប់​ស្ងាត់​ជាង​សព្វ​មួយ​ដង។

សារព័ត៌មាន CNN របស់​អាមេរិក ​រាយការណ៍​ថា​ ទំហំ​នៃ​ការ​លក់​ទំនិញ​នៅ​ចំព្រឹត្តិការណ៍ Black Friday​ ដែល​ចំ​ថ្ងៃ​ទី​២៧ ខែ​វិច្ឆិកា​នេះ បាន​ធ្លាក់​ចុះ​ដល់​ទៅ ៥២​ភាគរយ បើធៀប​នឹង​ឆ្នាំ​មុន។

របាយការណ៍​របស់​ក្រុមហ៊ុន Sensormatic Solutions បាន​និយាយ​ថា ការ​ធ្លាក់​ចុះ​បែប​នេះ គឺ​បណ្ដាល​មក​ពី​ក្ដី​បារម្ភ​ពី​ការ​ឆ្លង​រីក​រាល​ដាល​នៃ​វីរុស​កូរ៉ូណា និង​ការ​ធ្លាក​ចុះ​នៃ​សេដ្ឋកិច្ច​ព្រោះ​តែ​វិបត្តិ​សុខភាព​សកល។

ចំណែក​នៅ​ចំ​ព្រឹត្តិការណ៍​ Thanksgiving Day វិញ ការ​លក់​ទំនិញ​វិញ​បាន​ធ្លាក់​ចុះ​ដល់​ទៅ ៩៥វភាគរយ​ឯណោះ ដោយសារ​តែ​ហាង​ជាច្រើន​បាន​បិទ​ទ្វារ​របស់​ពួកគេ ដើម្បី​ផ្ដល់​ពេល​វេលា​ដល់​បុគ្គលិក​ឈប់​សម្រាក ហើយ​ចៀស​ផុត​ពី​មនុស្ស​ម្នា​អ៊ូរអរ។

ទោះជាយ៉ាងណា របាយការណ៍​ដដែល រក​ឃើញ​ថា ការ​បញ្ជា​ទិញ​ទំនិញ​តាម​អនឡាញ​ បាន​​ក្លាយ​ជា​ជម្រើស​ដ៏​ធំ​សម្រាប់​អតិថិជន​ដែល​បាន​ចំណាយ​ថវិកា​ដល់​ទៅ ៩​ពាន់​លាន​ដុល្លារ ពោល​គឺ​ស្មើ​នឹង ២៧.៥០​ដុល្លារ​ក្នុង​មួយ​នាក់។ បើធៀប​នឹង​ឆ្នាំ​មុនេះ តួលេខ​នេះ​បាន​កើន​ឡើង ២១.៦​ភាគរយ ដោយ​ឆ្នាំ​មុន ការ​បញ្ជា​ទិញ​តាម​អនឡាញ​មាន​ទំហំ​ត្រឹម​តែ ៧.៤​ពាន់​លាន​ដុល្លារ​តែ​ប៉ុណ្ណោះ៕