ថ្វី​បើ​វិបត្តិ​កូវីដ​១៩ ធនាគារ​អេស៊ីលីដា​​រក្សា​បាន​កំណើន​ប្រាក់​ចំណេញ​​ជាង ​៣៤​លាន​ដុល្លារ


Acleda Bank and China Development Bank
លោក អ៊ិន ចាន់នី ប្រធាន​អគ្គ​នាយក​ធនាគារ​អេស៊ីលីដា និង​អ្នក​ស្រី Lyu Zhinan អគ្គនាយក​រង​នៃ​ធនាគារ​ CDB សាខា​ខេត្ត​ក្វាងស៊ី ប្រទេស​ចិន ចុះ​ហត្ថលេខា​លើ​កិច្ច​ព្រម​ព្រៀង​​ឥណទាន​រយៈ​ពេល​វែង​មាន​តម្លៃ​ដល់​ទៅ ១៣០​លាន​ដុល្លារ នៅ​រាជ​ធានី​ភ្នំពេញ កាល​ពី​ថ្ងៃ​ទី​១០ ខែ​កក្កដា ឆ្នាំ​២០២០។ (Acleda Bank)

ធុរកិច្ច | ជ័យ ច័ន្ទឧត្ដម | 22 Nov 2020 | 0 Comments |

ធនាគារ​អេស៊ីលីដា ដែល​ជា​ធនាគារ​ពាណិជ្ជ​ធំ​ជាង​គេ​នៅ​កម្ពុជា បាន​ប្រកាសថា ធនាគារ​មួយ​នេះ​ទទួល​បាន​ប្រាក់​ចំណេញ​ដល់​ទៅ​ជាង ៣៤​លាន​ដុល្លារ​នៅ​ត្រីមាស​ទី​៣​ក្នុង​ឆ្នាំ​នេះ ដោយ​បាន​កើន​ឡើង​ដល់​ទៅ​ជិត ២៥​ភាគរយ បើធៀប​នឹង​ត្រីមាស​ទី​៣​ក្នុង​ឆ្នាំ​កន្លង​មក។

ធនាគារ​មួយ​នេះ បាន​ប្រកាស​ឱ្យ​ដឹង​អំពី​របាយការណ៍​ប្រាក់​ចំណេញ​ប្រចាំ​ត្រីមាស​ទី​៣​របស់​ខ្លួន​បែប​នេះ​នៅ​ក្នុង​សេចក្ដី​ប្រកាស​ព័ត៌មាន​កាល​ពី​ថ្ងៃ​ចន្ទ​កន្លង​មក​នេះ។

ក្នុង​សេចក្ដី​ប្រកាស​ព័ត៌មាន​ដដែល​នោះ ធនាគារ​អេស៊ីលីដា បាន​ឱ្យដឹង​ថា ខ្លួន​ទទួល​បាន​ចំណូល​សរុប​ដល់​ទៅ ១៤២.៤៧​លាន​ដុល្លារ​នៅ​ចន្លោះ​ខែកក្កដា ដល់​ចុង​ខែ​កញ្ញា​ឆ្នាំ​២០២០​នេះ ដោយ​បាន​កើន​ឡើង ១.៤០​លាន​ដុល្លារ ឬ​ប្រហែល ០.៩៩​ភាគរយ បើ​ធៀប​នឹង​ប្រាក់​ចំណូល ៣៤.៦២​លាន​ដុល្លារ ​ដែល​ធនាគារ​នេះ​រក​បាន​កាល​ពី​ត្រីមាស​ទី​៣​ឆ្នាំ​២០១៩​កន្លងមក។

សម្រាប់​ប្រាក់​ចំណេញ​វិញ ធនាគារ​អេស៊ីលីដា បាន​បញ្ជាក់​ថា ទទួល​បាន​ ៣៤.៦២​លាន​ដុល្លារ​អាមេរិក ឬ​កើន​ឡើង ៦.៨៩​លាន​ដុល្លារ​អាមេរិក ឬ​មាន​កំណើន​ ២៤.៨៦​ភាគរយ បើធៀប​នឹង​ប្រាក់​ចំណេញ​របស់​ធនាគារ​នេះ​កាល​ពី​ចន្លោះ​ខែ​កក្កដា​ដល់​ខែ​កញ្ញា​កាល​ពី​ឆ្នាំ​មុន។

ធនាគារ​ពាណិជ្ជធំ​បំផុត​របស់​កម្ពុជា​នេះ បាន​ប្រកាស​ឱ្យ​ដឹង​ពី​កំណើន​ប្រាក់​ចំណេញ​របស់​ខ្លួន​បែប​នេះ នៅ​ចំ​ពេល​ដែល​កម្ពុជា និង​ពិភព​លោក កំពុង​ជួប​ប្រទះ​នឹង​ក្ដី​បារម្ភ​នៃ​វិបត្តិ​សុខភាព​សកល ដែល​បណ្ដាល​មក​ពី​ការ​ឆ្លង​រីក​រាល​ដាល​នៃ​វីរុស​កូរ៉ូណា​ចាប់​តាំង​ពី​ដើម​ឆ្នាំ​នេះ​មក។

មន្ត្រី​ទំនាក់​ទំនង​សាធារណៈ អ្នកស្រី ម៉ារ អមរា ដែល​ជា​អនុ​ប្រធាន​នាយក​ប្រតិបត្តិ និង​ជា​គណៈ​ប្រធាន​នាយិកា​ប្រតិបត្តិ​ហិរញ្ញវត្ថុ​របស់​ធនាគារ​អេស៊ីលីដា បាន​ទទួល​ស្គាល់​​ពី​ប៉ះ​ពាល់​នៃ​ការ​រីក​រាល​ដាល​ជាសកល​នៃ​ជំងឺ​កូវីដ​-១៩​ទៅ​លើ​គ្រប់​វិស័យ។

ប៉ុន្តែ អ្នកស្រី អមរា អះអាង​ថា ធនាគារ​អេស៊ីលីដា​បាន​សម្រប​សម្រួល​ទៅ​នឹង​ស្ថានការណ៍​បែប​នេះ ​តាម​រយៈ​ការ​កែ​សម្រួល​របៀប​ផ្ដល់​ឥណទាន និង​ការ​ប្រើ​ប្រាស់​ប្រព័ន្ធ​ឌីជីថល​ទំនើប។

អ្នកស្រី ម៉ារ អមរា មាន​ប្រសាសន៍​ថា​៖ «ប៉ុន្តែ ធនាគារ​អេស៊ីលីដា បាន​បង្កើត​ឱ្យ​មាន​ភាព​វិជ្ជមាន​ដោយ​បង្កើត​ឱ្យ​មាន​កម្មវិធី​សំណើ​សុំ​ឥណទាន​ដែល​មាន​ភាព​សាមញ្ញ និង​ងាយ​ស្រួល​ប្រើ​ប្រាស់​ដោយ​មធ្យោបាយ​ឌីជីថល​តាម​រយៈ​កម្មវិធី​អេស៊ីលីដា​'សេវា​អេស៊ីលីដា​យូនីធី​ទាត់ចិត្ត'»

អ្នកស្រី អមរា មាន​ប្រសាសន៍​បន្ថែម​ថា​៖ «ហើយ​វា​ក៏​អាច​ប្រើ​ជាមួយ​គណនី​មាន​កាល​កំណត់​ផង​ដែរ រួម​ជាមួយ​អត្រា​ការ​ប្រាក់​សម្រាប់​ឥណទាន​ដែល​មាន​ភាព​បត់​បែន»

អ្នកស្រី អមរា បាន​ឱ្យ​ដឹង​ទៀត​ថា ធនាគារ​អេស៊ីលីដា បន្ត​ជំរុញ​ការ​ផ្ដល់​កម្ចី​ទៅ​ដល់​អតិថិជន​គ្រប់​វិស័យ​នៅ​អំឡុង​ស្ថានភាព​បែប​នេះ​តាម​រយៈ​ការ​ទម្លាក់​អត្រា​ការ​ប្រាក់​របស់​ខ្លួន ដែល​អ្នកស្រី​អះអាង​ថា ជំរុញ​ឱ្យ​ការ​ផ្ដល់​កម្ចី​ទៅ​ដល់​អតិថិជន​រក្សា​បាន​កំណើន​ដល់​ទៅ ៧​ភាគរយ​ឯ​ណោះ​បើធៀប​នឹង​តួលេខ​ដំណាច់​ឆ្នាំ​២០១៩​កន្លង​មក។

របាយការណ៍​របស់​ធនាគារ​អេស៊ីលីដា បង្ហាញ​ថា ធនាគារ​នេះ​ទទួល​បាន​កំណើន​ប្រាក់​បញ្ញើ ១៥៨.១៧​លាន​ដុល្លារ​នៅ​ក្នុង​ត្រីមាស​ទី​៣​កន្លង​មក​នេះ ខណៈ​ទំហំ​ប្រាក់​កម្ចី​ដែល​ធនាគារ​នេះ​ទម្លាក់​ទៅ​ឱ្យ​អតិថិជន ទទួល​បាន​កំណើន​ដល់​ទៅ ២៦៤.៥៤​លាន​ដុល្លារ បើធៀប​នឹង​តួលេខ​ដំណាច់​ឆ្នាំ​២០១៩​កន្លងមក។

គិត​ត្រឹម​ដំណាច់​ត្រីមាស​ទី​៣​ឆ្នាំ​២០២០​នេះ ធនាគារ​អេស៊ីលី​ដា​ផ្ដល់​កម្ចី​សរុប​ដល់​ទៅ​ជាង ៤,១៤៤​លាន​ដុល្លារ​ទៅ​ដល់​អតិថិជន​គ្រប់​វិស័យ​នៅ​ទូទាំង​ប្រទេស៕