ADB ផ្ដល់​កម្ចី​​ជិត​ ១២៨​លាន​​​ដុល្លារ​ដល់​កម្ពុជា​​សង់​​បណ្ដាញ​អគ្គិសនី


បណ្ដាញ​អគ្គិសនី
ពលរដ្ឋ​កម្ពុជា​ធ្វើ​ដំណើរ​លើ​ផ្លូវ​មួយ​ ដែល​អម​ដោយ​បង្គោល​ភ្លើង​ខ្ពស់​ៗ​សម្រាប់​បញ្ជូន​ចរន្ត​ថាមពល​អគ្គិសនីក្នុង​រាជ​ធានី​ភ្នំពេញ កាល​ពី​ខែ​កញ្ញា ឆ្នាំ​២០១៩។ (មេគង្គ ដេលី)

ធុរកិច្ច | ជ័យ ច័ន្ទឧត្ដម | 11 Sep 2020 | 0 Comments |

ធនាគារ​អភិវឌ្ឍន៍​អាស៊ី​ (ADB) បាន​ប្រកាស​អំពី​ការ​អនុម័ត​ផ្ដល់​​ប្រាក់​កម្ចី​ជាង ១០០​លាន​ដុល្លារ​ដល់​កម្ពុជា ដើម្បី​គាំ​ទ្រ​ដល់​ដំណើរការ​សាង​សង់ និង​ភ្ជាប់​បណ្ដាញ​អគ្គិសនី​របស់​ប្រទេស​នេះ។

ការ​អនុម័ត​កម្ចី​ដល់​កម្ពុជា​នេះ ត្រូវ​បាន​ប្រកាស​ឲ្យ​ដឹង​​នៅ​ថ្ងៃ​នេះ​តាម​រយៈ​សេចក្ដី​ប្រកាស​ព័ត៌មាន​របស់​ធនាគារ​អភិវឌ្ឍន៍​អាស៊ី​នៅ​ទីក្រុង​ម៉ានីល ស្ថិត​ក្នុង​ប្រទេស​ហ្វីលីពីន។

បើ​តាម​​សេចក្ដី​ប្រកាស​ព័ត៌មាន ធនាគារ​អភិវឌ្ឍន៍​អាស៊ី បាន​​សម្រេច​ផ្ដល់​​កម្ចី​ទំហំ ១២៧.៨​លាន​ដុល្លារ​សម្រាប់​កម្ពុជា​យក​មក​ចំណាយ​លើ​ដំណើរការ​សាង​សង់​បណ្ដាញ​បញ្ចូន​ចរន្ត​អគ្គិសនី និង​អនុ​ស្ថានីយ៍​អគ្គិសនី ដើម្បី​ផ្គត់​ផ្គង់​ថាមពល​អគ្គិសនី​ប្រកប​ដោយ​ស្ថេរភាព​សម្រាប់​រាជ​ធានី​ភ្នំពេញ និង​បណ្ដា​ខេត្ត​នានា។

នាយិកា​ធនាគារ​អភិវឌ្ឍន៍​អាស៊ី​ប្រចាំ​កម្ពុជា អ្នកស្រី ស៊ុននីយ៉ា ឌូរ៉ានី ចាម៉ាល់ (Sunniya Durrani-Jamal) បាន​និយាយ​នៅ​ក្នុង​សេចក្ដី​ប្រកាស​ព័ត៌មាន​នោះ​ថា កម្ចី​ដែល​ផ្ដល់​ទៅ​កម្ពុជា​នេះ អាច​ជួយ​ឲ្យ​កម្ពុជា​ចែក​ចាយ​ថាមពល​អគ្គិសនី​ក្នុង​តម្លៃ​សមរម្យ​ ដើម្បី​គាំ​ទ្រ​ដល់​ការ​អភិវឌ្ឍ​​ដោយ​ស្មើភាព។

អ្នកស្រី ស៊ុននីយ៉ា ឌូរ៉ានី ចាម៉ាល់ និយាយ​ថា​៖ «គម្រោង​​ពង្រីក​បណ្ដាញ​អគ្គិសនី​តង់ស្យុង​ខ្ពស់​ រួម​ជាមួយ​ការ​បន្ត​ផ្ដល់​ជំនួយ​របស់ ADB ទៅ​ដល់​កម្ពុជា​ក្នុង​​ផែនការ​ប្រព័ន្ធ​ថាមពល​អគ្គិសនី​នេះ បង្ហាញ​ថា ការ​ផ្គត់​ផ្គង់​ថាមពល​ប្រកប​ដោយ​និរន្តភាព​ អាច​ត្រូវ​បាន​ផ្ដល់​ក្នុង​តម្លៃ​សមរម្យ​សម្រាប់​គាំទ្រ​ដល់​ការ​អភិវឌ្ឍ​ដោយ​ស្មើភាព»

អ្នកស្រី ស៊ុននីយ៉ា បន្ថែម​ថា ប្រព័ន្ធ​ស្តុក​ថាមពល​អគ្គិសនី​នេះ នឹង​បង្ហាញ​ពី​របៀប​ដែល​​ការ​ដាក់​ចេញ​នូវ​ការ​អនុវត្ត​បច្ចេកវិទ្យា​ប្រកប​ដោយ​ភាព​ច្នៃ​ប្រឌិត អាច​ត្រូវ​បាន​យក​មក​ប្រើ​ប្រាស់​នៅ​ក្នុង​ប្រព័ន្ធ​ផ្គត់​ផ្គង់​អគ្គិសនី​កម្ពុជា​នា​ពេល​អនាគត និង​ផលិត​ថាមពល​កកើត​ឡើង​វិញ​កាន់​តែ​ច្រើន។

បើ​តាម​សេចក្ដី​ប្រកាស​ព័ត៌មាន​ដដែល គម្រោង​ពង្រីក​បណ្ដាញ​អគ្គិសនី​តង់ស្យុង​ខ្ពស់ នឹង​ដំណើរការ​នូវ​ប្រព័ន្ធ​ផផ្ទុក​ថាមពល​ទំហំ​ធំ​លើក​ដំបូង​នៅ​កម្ពុជា ដែល​ទទួល​បាន​ជំនួយ ៦.៧​លាន​ដុល្លារ ក្នុង​នោះ​ទឹក​ប្រាក់ ៤.៧​លាន​ដុល្លារ ទទួល​បាន​ពី​កម្មវិធី​ពង្រីក​ថាមពល​កកើត​ឡើង​វិញ​នៅ​តាម​បណ្ដា​ប្រទេស​មាន​ប្រាក់​ចំណូល​ទាប និង​ប្រាក់​ ២​លាន​ដុល្លារ​ទៀត​ បាន​មក​ពី​មូលនិធិ​ថាមពល​ស្អាត។

ធនាគារ​អភិវឌ្ឍន៍​អាស៊ី បាន​និយាយ​ថា រដ្ឋាភិបាល​កម្ពុជា​បាន​កំណត់​យក​ការ​អភិវឌ្ឍ​វិស័យ​ថាមពល​ជា​អាទិភាព​ជាតិ ខណៈ​ដែល​ការ​ផ្គត់​ផ្គង់​ថាមពល​កាន់​តែ​ច្រើន នឹង​ជួយ​ជំរុញ​ផលិតកម្ម​សេដ្ឋកិច្ច និង​គុណភាព​ជីវិត។

ADB បាន​និយាយ​ថា ​កម្ចី​នេះ​នឹង​ជួយ​អគ្គិសនី​កម្ពុជា​ឲ្យ​ពង្រឹង​ហេដ្ឋា​រចនា​សម្ព័ន្ធ​បញ្ជូន​ចរន្ត​អគ្គិសនី​តាម​រយៈ​ការ​សាង​សង់​បណ្ដាញ​បញ្ជូន​អគ្គិសនី ១១៥ ទៅ ២៣០​គីឡូវ៉ាត់ និង​អនុ​ស្ថានីយ៍​ចំនួន ១០​នៅ​រាជ​ធានី​ភ្នំពេញ កំពង់ឆ្នាំង កំពង់ចាម និង​ខេត្ត​តាកែវ។

គិត​ចាប់​តាំង​ពី​ឆ្នាំ​១៩៩៤​មក កម្ចី​ទំហំ​ជិត ២០០​លាន​ដុល្លារ ត្រូវ​បាន​ធនាគារ​មួយ​នេះ​ផ្ដល់​ទៅ​ឲ្យ​វិស័យ​ថាមពល​របស់​កម្ពុជា ហើយ​ធនាគារ​នេះ​ក៏​ផ្ដល់​ជំនួយ​បច្ចេកទេស​មាន​តម្លៃ ៦​លាន​ដុល្លារ​ផង​ដែរ៕