ធនាគារ​អភិវឌ្ឍន៍​អាស៊ី​ផ្ដល់​កម្ចី​១.៥​ពាន់​លាន​ដុល្លារ​ឱ្យ​​ថៃ​​ស្ដារ​សេដ្ឋកិច្ច


វត្ត​អសោករាម
វត្ត​អសោករាម​ ស្ថិត​ក្នុង​ខេត្ត​សាមុទ្រប្រាកាន ប្រទេស​ថៃ ត្រូវ​បាន​ផ្សព្វផ្សាយ​ដោយ Amazing Thailand កាល​ពី​ថ្ងៃទី​៦ ខែ​មិថុនា ឆ្នាំ​២០២០ សម្រាប់​ជំរុញ​វិស័យ​ទេសចរណ៍​ឡើង​វិញ ក្រោយ​ពី​វិស័យ​នេះ​បាន​រង​ផល​ប៉ះ​ពាល់​បណ្ដាល​មក​ពី​ការ​ឆ្លង​រីក​រាល​ដាល​នៃ​វីរុស​កូរ៉ូណា។ (Amazing Thailand)

​អន្តរ​​ជាតិ | ជ័យ ច័ន្ទមុន្នី | 08 Aug 2020 | 0 Comments |

ឆ្លង​កាត់​វិបត្តិ​សុខភាព​សកល​ដែល​បណ្ដាល​មក​ពី​ការ​ឆ្លង​រីក​រាល​ដាល​នៃ​វីរុស​កូរ៉ូណា​អស់​រយៈ​ពេល​ ៧​ខែ​មក​នេះ ប្រទេស​ថៃ​ក៏​ដូច​បណ្ដា​ប្រទេស​នានា​នៅ​លើ​ពិភព​លោក កំពុង​​ប្រឈម​មុខ​នឹង​ការ​ធ្លាក់​ចុះ​នៃ​កំណើន​សេដ្ឋកិច្ច ឬ​ការ​រីក​លូត​លាស់​នៃ​សេដ្ឋកិច្ច​​បាន​ថម​ថយ​​កំណើន។

ដើម្បី​គាំ​ទ្រ​ដល់​ការ​ប្រយុទ្ធ​ប្រឆាំង​នឹង​ជំងឺ​ឆ្លង​នេះ ធនាគារ​អភិវឌ្ឍន៍​អាស៊ី​ (ADB) បាន​ប្រកាស​គាំ​ទ្រ​ប្រទេស​ថៃ​តាម​រយៈ​ការ​ផ្ដល់​កម្ចី​ដល់​ទៅ ១.៥​ពាន់​លាន​ដុល្លារ។

ក្នុង​សេចក្ដី​ប្រកាស​ព័ត៌មាន​កាល​ពី​ដើម​សប្ដាហ៍​នេះ ធនាគារ​ពិភព​លោក បាន​និយាយ​ថា ខ្លួន​ប្ដេជ្ញា​ផ្ដល់​ការ​គាំ​ទ្រ​ទាន់​ពេល​វេលា​ដល់​ប្រទេស​ថៃ និង​ជួយ​កាត់​បន្ថយ​ផល​ប៉ះ​ពាល់​ផ្នែក​សង្គម និង​សេដ្ឋកិច្ច​មក​លើ​ប្រទេស​នេះ​ដែល​បណ្ដាល​មក​ពី​វិបត្តិ​ជំងឺ​ឆ្លង​នេះ។

នាយក​ធនាគារ​អភិវឌ្ឍន៍​អាស៊ី លោក ម៉ាសាតស៊ូហ្គូ អាសាកាវ៉ា (Masatsugu Asakawa) លើក​ឡើង​ក្នុង​សេចក្ដី​ប្រកាស​ព័ត៌មាន​នោះ​ថា កម្ចី​របស់​ធនាគារ​នេះ នឹង​ជួយ​គាំ​ទ្រ​ដល់​កញ្ចប់​ថវិកា​សង្គ្រោះ​របស់​រដ្ឋាភិបាល​ថៃ ដែល​មាន​បំណង​ធ្វើ​ឱ្យ​ប្រព័ន្ធ​សុខាភិបាល​របស់​ប្រទេស​កាន់​តែ​ល្អ​ប្រសើរ​សម្រាប់​ត្រៀម​ខ្លួន​ទប់​ទល់​នឹង​រលក​ដែល​អាច​កើត​មាន​ឡើង​នា​ពេល​អនាគត​នៃ​វីរុស​កូរ៉ូណា។

បើ​តាម​សេចក្ដី​ប្រកាស​ព័ត៌មាន​ដដែល​នេះ កម្ចី​ដែល​ធនាគារ​អភិវឌ្ឍន៍​អាស៊ី​ផ្ដល់​ទៅ​ប្រទេស​ថៃ ក៏​ជួយ​ការពារ​ពលរដ្ឋ​ងាយ​រង​គ្រោះ គាំទ្រ​ដល់​សហគ្រាស​ខ្នាត​តូច និង​មធ្យម​ក្នុង​វិស័យ​​នានាដែល​ទទួល​រង​ផល​ប៉ះ​ពាល់​កើត​ចេញ​ពី​វិបត្តិ​សុខភាព​នេះ ដូចជា វិស័យ​ទេសចរណ៍ និង​ផលិតកម្ម និង​ផ្ដល់​កម្លាំង​ជំរុញ​កំណើន​សេដ្ឋកិច្ច​ទាំង​មូល។

ធនាគារ​អភិវឌ្ឍន៍​អាស៊ី​ចាត់​ទុក​ប្រព័ន្ធ​សុខាភិបាល​ថៃ​ថា មាន​លក្ខណៈ​ទំនើប​កាន់​តែ​ខ្លាំង​ហើយ​នៅ​ក្នុង​តំបន់​អាស៊ី​អាគ្នេយ៍ ប៉ុន្តែ ប្រទេស​នេះ​នៅ​តែ​ស្ថិត​ក្នុង​ស្ថានភាព​ងាយ​រង​គ្រោះ​ខ្ពស់​បំផុត​ចំពោះ​ជំងឺ​ឆ្លង​នេះ ដោយសារ​តែ​ប្រទេស​នេះ​មាន​ទំនាក់​ទំនង​យ៉ាង​ជ្រៅ​ទៅ​នឹង​សេដ្ឋកិច្ច​តំបន់ និង​ពិភព​លោក។

តាម​ការ​ព្យាករ​ដោយ​ធនាគារ​អភិវឌ្ឍន៍​អាស៊ី សេដ្ឋកិច្ច​ថៃ​នឹង​ធ្លាក់​ចុះ​ដល់​ទៅ ៦.៥​ភាគរយ​នៅ​ឆ្នាំ​២០២០​នេះ ពោល​គឺ​ផ្ទុយ​ពី​ការ​ព្យាករកាល​ពី​ខែ​ធ្នូ​ចុង​ឆ្នាំ​មុន ដែល​ប៉ាន់​ប្រមាណ​ថា ​មាន​កំណើន ៣​ភាគរយ​នោះ៕